Իրանի արդյունաբերական զարգացման և վերակառուցման կազմակերպության (IDRO) նախագահ Մանսուր Մոազամին և ռուսական «Գազպրոմ» ընկերության նախագահի տեղակալ Վիտալի Մարկելովը կիրակի փոխըմբռնման հուշագիր են ստորագրել: Այս մասին հայտնում է IRNA-ն:
Մոազամին ընդգծել է արդյունաբերության, նաև նավթի և գազի ոլորտում IDRO-ի 50-ամյա աշխատանքային փորձը և «Գազպրոմի» հետ այդ կազմակերպության լիակատար համագորակցության պատրաստակամություն է հայտնել:
Մարկելովը նշել է ռուսական ընկերության գործունեության տարբեր ոլորտները և հայտարարել է, որ ընկերությունն ակտիվորեն աշխատում է աշխարհի 26 երկրում:
ՌԴ էներգետիկայի նախարար Ալեքսանդր Նովակն ավելի վաղ ասել էր, որ «Գազպրոմ» ընկերությունը մտադիր է բնական գազ արդյունահանել Իրանում, հետո 1200-կիլոմետրանոց խողովակաշարով գազը Հնդկաստան փոխանցել:
Նա հավելել է, որ այդ նախագիծը կիրականացվի մինչև 2018 թ.: