Միջազգայնագետ Ստեփան Գրիգորյանի կարծիքով՝ Ղարաբաղյան հարցն այսօր ավելի ցավոտ են ընդունում Թուրքիայում, քան Ադրբեջանում: «Թուրքերը հայ ժողովրդից խլել են ունեցվածք, հող ու կյանք։ Իրենց համար դա ազգի մենթալիտետի խնդիր է»,- «Առաջին լրատվական»-ի հետ զրույցում նման տեսակետ հայտնեց Գրիգորյանը՝ պատասխանելով մեր այն հարցին, թե ինչո՞ւ է Էրդողանը Ղարաբաղյան հարցով Պուտինի հետ հանդիպում նախաձեռնում։
Գրիգորյանը նշում է՝ Էրդողանի նախաձեռնությունը կապված չէ Ալիևի զանգի հետ. «Նա իր մեջ չի կարողանում դա ընդունել։ Երկրորդ՝ այո՛, Թուրքիան հասկանում է՝ եթե այսպես շարունակվի, Ադրբեջանը մեկընդմիշտ կկորցնի Ղարաբաղը։ Ղարաբաղն իր անկախությունն ուժեղացնում է, Ղարաբաղի բնակչությունը մեծանում է, տնտեսությունը, ճիշտ է, փոքր է, բայց դինամիկ։ Սա է պատճառը, որ նա այդ հարցն ուզում է նորից բարձրացնել։ Տարածաշրջանում գործընթացներ են ընթանում, ինքն ուզում է տեղավորվել այնտեղ՝ մի բան տալ Ռուսաստանին, դրա փոխարեն մի բան ստանալ։ Բայց ես չեմ հավատում, որ կստանա, և ոչ նրա համար, որ Ռուսաստանը մեր մասին է մտածում։ Իրենք պարզապես մտածում են՝ ո՞վ է Էրդողանը, որ միջամտի մեր ներքին հարցերին։ Ես համոզված եմ՝ Պուտինը կուլտուրական կասի՝ ի՞նչ կապ ունես այդ հարցի հետ»։
Մեր զրուցակիցը չի բացառում, որ Թուրքիայի ակտիվացումը Ղարաբաղյան հարցում կարող է կապված լինել նաև այն բանի հետ, որ Միացյալ Նահանգներն այժմ ավելի շատ զբաղված է ներքին խնդիրներով և Ղարաբաղյան հարցն առաջնահերթություն չի համարում:
«Այդտեղ կա ճշմարտություն։ Ես չեմ ուզում ասել, որ շատ են հեռացել, բայց Թրամփի վարչակարգն այսօր մի քանի ավելի խոշոր հարցերով է զբաղված։ Այստեղ կա նաև մեր խնդիրը՝ մենք պետք է անընդհատ աշխատենք ամերիկացիների ու ֆրանսիացիների հետ, որպեսզի նրանք էլ հետաքրքրվեն Ղարաբաղյան հարցով»,- եզրափակեց նա։
Հարցազրույցն ամբողջությամբ՝ տեսանյութում: