Երեք տասնյակից ավելի քառօրյա պատերազմի մասնակից ուսանողների ուսման զեղչերը չեն արվում, խնդիրը առկա է հատկապես ԵՊՀ-ում։ Այս մասին «Առաջին լրատվական»-ի հետ զրույցում ասաց «Դիրքապահ» քառօրյա պատերազմի մասնակիցների միավորման ղեկավար Մանուել Մանուկյանը՝ հավելելով, որ նախ՝ զեղչ չի արվոմ, քանի որ զինգրքույկում նշված չէ, որ ապրիլյան պատերազմի մասնակից են, և երկրորդ՝ պատճառաբանում են նաև ուսման առաջադիմության հետ կապված հարցերը՝ անգամ մարտական հերթապահության համար նախատեսված 30 տոկոս զեղչը չկիրառելով։
«Այսօր փորձեցինք տեսնել ռեկտորին՝ թույլ չտվեցին։ Ուզում ենք հրավիրել հանրության, քաղաքական գործիչների, մանավանդ ԿԳ, պաշտպանության նախարարների ուշադրությունը, որպեսզի զբաղվեն այս հարցով։ Տղաները ապրիլյան պատերազմին ծառայել են, որոշներին, բիլետների մեջ այդ մասին չգրելով, չեզոքացրին, որոշներին էլ մարտական հերթապահության համար զեղչը չկիրառելու համար ՄՈԳ սահմանելով են ուզում հեռացնել, ինչ է որ կարողանան գումար աշխատել։ Հոգնել ենք փաստաթղթերով տարբեր կառույցներ գնալ-գալուց, դիմում ենք ՀՀ վարչապետին, նախագահին, որպեսզի այս խնդիրները լուծվեն. մենք իրենց բոլոր հրամանները կատարել ենք, մենք առաջնագծում եղել ենք, ինչքան կարողացել ենք՝ էդ առաջնագիծը պահել ենք, հիմա խնդրում ենք, որ լուծեն այս հարցերը»,- շեշտեց նա։
ԵՊՀ Աշխարհագրության ֆակուլտետի ուսանողներ Սամվել Մանուկյանը և Գևորգ Գրիգորյանը ընդգծեցին, որ մարտական հերթապահության համար նախատեսված զեղչից չեն կարողանում օգտվել, քանի որ ՄՈԳ-ի շեմը բարձրացվել է։
«Ես ծառայել եմ Մարտունի 2-ում, ապրիլի 2-ից բարձրացել եմ առաջնագիծ, բայց ինչպես շատերի, այնպես էլ իմ զինգրքույկում չեն նշել, որ ապրիլյան պատերազմի մասնակից եմ. մասնակիցների մեծ մասի զինգրքույկում նշված չէ, գոնե էս մարտական հերթապահության հետ կապված ՄՈԳ-ի շեմը թող բարձր չդնեն, ժամանակին 8 էր, հետո 9, հիմա էլ՝ 10, ուզում են 11 դարձնել»,- նշեց Գևորգ Գրիգորյանը։
Ապրիլյան պատերազմի մի շարք մասնակից ուսանողներ այսօր զեղչից զրկված տղաների հետ փորձում էին հանդիպել ԵՊՀ ռեկտորին, որպեսզի իրենց մարտական ընկերներին աջակցեն։ Մարտի դաշտում վիրավորված ուսանողներից Հայկ Թորոսյանը ընդգծեց, որ ինքը ծանր վիրավորում է ստացել, և չնայած իր ուսման վարձը զեղչել են, բայց տարբերակված մոտեցումը ճիշտ չէ, քանի որ վիրավորներն էլ ողջ են մնացել իրենց մարտական ընկերների շնորհիվ, որոնց հետ այսօր արդար չեն վարվում։
Մանրամասները՝ տեսանյութում: