«Հանուն Հայաստան պետության» ճակատը հրապարակեց հռչակագիրը, որի շուրջ տևական ժամանակ է՝ Ժիրայր Սեֆիլյանի հրապարակած ցուցակի անձինք քննարկումներ էին տանում։
Ճակատի նախաձեռնողներից Պետրոս Մակեյանը «Առաջին լրատվական»-ի հետ զրույցում ասաց, որ իրենք զուգահեռ նաև գործողությունների պլան են մշակում. «Գործողության քայլերը նախապես չենք հրապարակի, որ վարչախումբը կանխարգելիչ քայլերի հնարավորություն չունենա։ Այդ առումով պակաս հրապարակայնություն կլինի»։
Մեր զրուցակիցը հավելեց, որ առաջիկայում գործողությունների ճանապարհային քարտեզի հետ կապված կոնկրետ քննարկումներ կլինեն: «Բացի այդ՝ քաղաքականության մեջ լուրջ խնդիր կա պահի ճիշտ ընտրության առումով։ Մենք չենք կարող ասել՝ այսօր, վաղը կամ մեկ ամիս հետո կիրականացնենք։ Կախված է ներքին և արտաքին զարգացումներից։ Մենք պետք է ճիշտ պահն ընտրենք»,- ընդգծեց Պետրոս Մակեյանը։
Նա նշում է՝ հարմար պահ կարող է լինել, օրինակ, Ղարաբաղյան հարցը. «Իրենք բացահայտ հասկացրել են, որ հողեր են հանձնելու։ Այդ մասին Սերժ Սարգսյանը բացահայտ ասել է և՛ ինքնաթիռի մեջ, և՛ վերջերս էլ «ցավոտ լուծումների» մասին խոսելով։ Սա կարող է լինել լուրջ քաղաքական պահ՝ գործընթաց սկսելու ու այս համակարգից ազատվելու համար»։
Պետրոս Մակեյանը կարծում է, որ իշխանություններն այսօր վախենում են իրենց գործողություններից և նաև վախենում են, որ մարդիկ հրապարակ դուրս կգան. «Նախապես կանխորոշել, թե ինչ կստացվի՝ շատ բարդ է։ Բայց հավաքված մարդիկ տարբեր աշխարհաքաղաքական պատկերացումների տեր են, այդ ամենը դրել են մի կողմ, հավաքվել՝ դա առաջին իմպուլսն է, որ լուրջ ենք տրամադրված։ Մենք այդ գործընթացի համար անհրաժեշտ բազա ունենք՝ ժողովուրդն այս վարչախումբը չի ընդունում»։
Հարցազրույցն ամբողջությամբ՝ տեսանյութում: