Լոռու մարզում, նոյեմբերի 2-ին, ավտովթար-հրդեհ է տեղի ունեցել. ժամը 19։20-ի Վրաստանի Բոլնիսի շրջանի բնակիչ՝ 22-ամյա Խաչատուր Մ.-ն իր վարած BMW մակնիշի QQ 046 MM համարանիշի ավտոմեքենայով Ստեփանավան-Վանաձոր ավտոճանապարհի 6-րդ կմ հատվածում դուրս է եկել ճանապարհի երթևեկելի գոտուց և գլխիվայր շրջվել։
Shamshyan.com-ի փոխանցմամբ, վթարի հետևանքով ավտոմեքենայում հրդեհ է բռնկվել և այն ամբողջովին վերածվել է մոխրակույտի։
Միաժամանակ, ժամը 23։30-ին Վանաձորի բժշկական կենտրոնից Ոստիկանության Բազումի բաժին հայտնել են, որ «աջ բազուկոսկրի գլխիկի հոդախախտ, մեծ թմբիկի կոտրվածք, գլխուղեղի ցնցում» ախտորոշմամբ իրենց մոտ բուժօգնության է դիմել Վանաձորի բնակիչ 25-ամյա Յուրի Ս.-ն, իսկ «սրբանային շրջանի սալջարդ-պատռված վերք» ախտորոշմամբ՝ 27-ամյա Արթուր Մ.-ն։ Վերջիներս հիվանդանոց մեկնած ոստիկաններին հայտնել են, որ իրենք վնասվածքները ստացել են ծառից վայր ընկնելու հետևանքով, մինչդեռ ոստիկանները տաք հետքերով բացահայտել են, որ նրանք մարմնական վնասվածքները ստացել են նշված ավտովթարի հետևանքով։