«Հարավկովկասյան երկաթուղիներ» ՓԲԸ ղեկավարությունը չի պատրաստվում կրճատել Սանահինի դեպոյի աշխատակիցներին, ընդհակառակը` նրանց թիվը համալրելու է, աշխատավարձերն էլ` բարձրացնելու: ՓԲԸ-ի պատասխանատուները ֆինանսական առումով այլևս աննպատակահարմար են համարում Սանահինի դեպոն պահելը, ուստի այն շրջադարձայինի են վերածում, պրոֆիլն են փոխում, որպեսզի այն չկորցնի նաև իր ռազմավարական նշանակությունը: Նոյեմբերի 16-ի ասուլիսում այսպիսի հավաստիացումներ է տվել ՀԿԵ-ի հասարակայնության հետ կապերի ծառայության պետ Վահե Դավթյանը: Հիշեցնենք, որ Սանահինի դեպոն վերածվելու է շրջադարձային դեպոյի՝ մտնելով Գյումրիի դեպոյի կազմի մեջ, ինչի կապակցությամբ դեպոյի աշխատակիցները դժգոհել են՝ նշելով, որ այդ փոփոխությունների պատճառով դեպոյի աշխատակիցների քանակը կրճատվելու է: Այս պահի դրությամբ Սանահինի դեպոյի աշխատակիցների թիվը 134 է, իսկ ըստ նոր հաստիքացուցակի կդառնա 146: Նրանցից 70-ը կաշխատեն Սանահինի դեպոյի տեղում ստեղծվելիք նորացված մեքենայացված գծի ուղեմասում, իսկ մնացածը` Գյումրիում: ՀԿԵ-ի պատասխանատուի փոխանցմամբ` արդեն դեկտեմբերի 1-ից 20-30 տոկոսով ավելանալու է բանվորների ժամավարձը, փականագործների աշխատավարձերը բարձրանալու են 20 տոկոսով՝ հասնելով 98 200 դրամի: Մինչդեռ դեպոյի աշխատակիցները սա բլեֆ են համարում, նախաձեռնությունն էլ` աննպատակահարմար. նրանց խոսքով՝ մեքենավարներն այսպես թե այնպես դուրս են մնում, քանի որ մեքենավարը չի կարող նոր ստեղծվելիք կառույցում գնացք կամ ինչ-որ այլ բան վերանորոգել, քանի որ դրա մասնագետը չէ: Բացի այդ, նրանք կարևորում են դեպոյի գոյությունն ու մեքենավարի աշխատանքն այն առումով, որ Հայաստան մտնող գնացքը բազմաթիվ դժվարանցանելի ճանապարհներով, շրջադարձերով է գալիս և դեպոյում պարտադիր պետք է կանգնի, հանգստանա, տեխնիկական վիճակը ստուգվի, մեքենավարը փոխվի, գծերը ստուգվեն, որից հետո միայն գնացքը շարժվի: Հակառակ դեպքում երկաթուղային վթարները, որոնց մասին վերջին ժամանակներս հաճախ ենք լսում, անխուսափելի կլինեն: