Ադրբեջանն ու Իրանը պայմանավորվել են «Հյուսիս-Հարավ» տրանսպորտաին միջանցքի նախագծի շրջանակում Ռեշտ-Աստարա երկաթուղային հատվածի շինարարությունը ֆինանսավորելու պայմանների մասին։ Այս մասին Trend-ի հետ հարցազրույցում ասել է Իրանի ԿԲ միջազգային հարցերով գլխավոր տնօրեն Հուսեյն Յագուբին։
Նրա խոսքով՝ ԿԲ-ի, էկոնոմիկայի և ֆինանսների նախարարությունների, ինչպես նաև Իրանական երկաթուղիների ներկայացուցիչները երեկ Բաքվում կայացած հանդիպման ժամանակ պայմանավորվել են ադրբեջանցի գործընկերների հետ երկաթուղու շինարարության համար վարկի տրամադրման պայմանների մասին։
«Ադրբեջանը համաձայնել է 500 մլն դոլարի չափով վարկ տրամադրել 164 կմ երկարությամբ երկաթգծի շինարարության համար»,-ասել է Յագուբին։
Նա նաև հավելել է, որ վարկային համաձայնագրի ստորագրման պաշտոնական արարողությունը տեղի կունենա Թեհրանում մոտ ապագայում։
Ռեշտ-Աստարա երկաթգիծը հանդիսանում է «Հյուսիս-Հարավ» տրանսպորտային միջանցքի կարևոր մաս, որը կոչված է միացնելու Հյուսիսային Եվրոպան Հարավարևելյան Ասիային, այդ թվում միավորելու Ադրբեջանի, Իրանի և Ռուսաստանի երկաթուղիները։ Առաջին փուլով միջանցքով ծրագրվում է փոխադրել տարեկան 5 մլն տոննա բեռ, իսկ հետագայում՝ ավելի քան 10 մլն տոննա։
