ԵՄ-ի և Ադրբեջանի միջև ռազմավարական գործընկերության մասին համաձայնագրին առնչվող բանակցությունները պետք է ավարտվեն մինչև տարեվերջ։ Այս մասին հայտարարել է ընդլայնման և հարևանության քաղաքականության հարցերով եվրահանձնակատար Յոհանես Հանը Տալինում անցկացվող «Արևելյան գործընկերության» 4-րդ բիզնես ֆորումի շրջանակում կլոր սեղանի ժամանակ։
«Ներկայում բանակցությունները շարունակվում են, որոշ ժամանակ է պահանջվել՝ պարզելու համար, թե որ ոլորտները կընդգրկի այդ համաձայնագիրը։ Վստահ եմ, որ համաձայնագիրը ձեռք կբերվի առաջիկա ամիսներին»,-ասել է եվրահանձնակատարը։
Նոր համաձայնագիրը պետք է փոխարինի գործընկերության և համագործակցության մասին 1996 թվականի համաձայնագիրը, ինչը թույլ կտա առավելագույնս հաշվի առնել ընդհանուր նպատակներն ու խնդիրները, որոնց բախվում են այսօր ԵՄ-ն ու Ադրբեջանը։