Նոյեմբերի 12-ին նախատեսված «23, 5» ադրբեջանական ֆիլմերի փառատոնն այս տարի նույնպես չկայացավ: Փառատոնի կազմակերպիչ, «Խաղարարար նախաձեռնությունների կովկասյան կենտրոն» հասարակական կազմակերպության նախագահ, իրավապաշտպան Գեորգի Վանյանը, այսօր խոսելով փառատոնի հետագա անելիքների մասին, նշել է, որ այն Հայաստանի քաղաքացիների համար էր նախատեսված և որևէ քաղաքական նպատակ չի հետապնդել: 2009-ի նոյեմբերին նույնպես խնդիր է եղել՝ կապված կինոսրահների տրամադրման հետ. «Միշտ վերջին պահին ահաբեկված սեփականատերը հրաժարվում էր տրամադրել իր տարածքը` առանց պատճառաբանության»,- ասաց Գեորգի Վանյանը` խորհուրդ տալով լրագրողներին հետաքննություն սկսել, թե կոնկրետ ով է արգելում փառատոնը: Սակայն սա չի նշանակում, որ փառատոնը տեղի չի ունենա: Գեորգի Վանյանի խոսքերով,Հայաստանում նախափառատոնյան օրեր և ադրբեջանական ֆիլմերի ցուցադրություններ են սկսվում բոլոր այն քաղաքացիների, առաջին հերթին՝ լրագրողների համար, ովքեր ուզում են դիտել ֆիլմերը: Լրագրողներից մի քանիսն ուզում էին՝ Գեորգի Վանյանը պատմի ֆիլմերի բովանդակությունը, սակայն վերջինս առաջարկեց գնալ և դիտել ֆիլմերը՝ նշելով, որ ինքը ֆիլմ պատմող չէ. «Վերջին հինգ տարիներին Ադրբեջանում նկարահանված ֆիլմերից ընտրել ենք այն ֆիլմերը, որոնք մենք համարել ենք բարձրաժեք ֆիլմեր, որոնք քարոզչության նպատակ չունեն և Ղարաբաղյան հակամարտության հետ ընդհանրապես կապ չունեն: