Երևանի ավագանու «Ելք» խմբակցության անդամ Արայիկ Հարությունյանը պատրաստվում է այսօր դիմել Գլխավոր դատախազություն՝ կապված Երևանի քաղաքապետարանի հանրակրթության վարչության նախկին պետ, Վերահսկիչ պալատի նախկին նախագահ Իշխան Զաքարյանի կնոջ՝ Գայանե Սողոմոնյանին պատկանող «Վարդանանք» կրթահամալիրի հետ։ Արայիկ Հարությունյանը ցանկանում է, որպեսզի դատախազությունը պարզի, թե ինչպես է հանրակրթության վարչության նախկին պետը իր պաշտոնավարման ժամանակ դպրոցներից մեկի տարածքը տրամադրել իր ընտանիքի հետ առնչություն ունեցող կրթական հաստատությանը, և արդյոք այստեղ չկա՞ն կոռուպցիոն դրսևորումներ։
«Այն փաստը, որ մարդը հանրակրթության վարչության պետ է, ունի մասնավոր դպրոց, դպրոցներից մեկն էլ տեղակայված է հանրակրթական դպրոցի մասնաշենքում, որի տարածքը տրամադրվել է 20 տարի ժամկետով, այստեղ, իմ կարծիքով, կարող է կոռուպցիա լինել»,- ասաց Հարությունյանը՝ հավելելով, որ ինքը ենթադրում է, որ մասնաշենքը Գայանե Սողոմոնյանի մասնավոր կրթահամալիրին է տրամադրվել թերևս առանց մրցույթի, որը դատախազությունը կպարզի։
Նշենք, որ 2012 թվականին թիվ 41 դպրոցի մի մասնաշենքը դեռ 2012 թվականին 20 տարով վարձակալությամբ տրվել է Գայանե Սողոմոնյանին պատկանող «Վարդանանք» կրթահամալիրին։ Այս տարի դպրոցների օպտիմալացման որոշումից հետո թիվ 41 դպրոցը ևս օպտիմալացվեց, և հայտնի դարձավ, որ այն ամբողջությամբ տրվելու է Գայանե Սողոմոնյանի կրթահամալիրին։ Արայիկ Հարությունյանը, սակայն, պնդում է, որ այդ դպրոցը ոչ թե ամբողջությամբ պետք է տալ Սողոմոնյանի կրթահամալիրին, այլ ավելացնել մանկապարտեզների թիվը՝ ի հաշիվ ազատված մասնաշենքի:
Այդ հարցով Հարությունյանը դիմել է քաղաքապետարան, իսկ դրանից առաջ դիմել է խնդրանքով, որպեսզի դպրոցի մնացած մասնաշենքը տրամադրվի «Հայ Ասպետ»-ին, որի համար իրեն դիմել էր Կարին Տոնոյանը։ Սկզբում բանավոր համաձայնություն էր եղել, սակայն հետո Կարին Տոնոյանին առաջարկվել էր Կոնդում գտնվող թիվ 23 ավերված դպրոցը՝ պատճառաբանությամբ, որ թիվ 41 դպրոցի տարածքն ամբողջությամբ պետք է տրամադրվի Գայանե Սողոմոնյանին։ Արայիկ Հարությունյանի բարձրացրած աղմուկից հետո, սակայն, քաղաքապետարանից պատասխան է ստացել, որում նշված է, որ թիվ 41 դպրոցում նախատեսվում է հիմնել մանկապարտեզ։
Անդրադառնալով հարցին, թե ինչ սպասելիք կա, որ դատախազությունը պատշաճ ուշադրության կարժանացնի իր դիմումը՝ հաշվի առնելով, թե ովքեր են մյուս կողմում, Հարությունյանը պատասխանեց․«Ես կարծում եմ, որ բոլոր այն խնդիրները, որոնք մենք նկատում ենք, պետք է իրավական բոլոր ընթացակարգերով, խողովակներով անցկացնենք։ Եթե նույնիսկ այդ խնդիրները լուծում էլ չեն ստանում, ապա դրանք բարձրաձայնվում են, խնդիր են ստեղծում հետագայում նման խախտում անել ցանկացողների համար»։