Երկու գրությունները, որոնք Ալբերտ Էյնշտեյնը 95 տարի առաջ Տոկիոյում տվել էր սուրհանդակին, աճուրդի են դրվել Երուսաղեմում։ Այս մասին հայտնում է AFP-ն։
Էյնշտեյնը դասախոսություններով է հանդես եկել Ճապոնիայում, երբ ստացել է տեղեկություն՝ իրեն Նոբելյան մրցանակ շնորհելու մասին։ Սուրհանդակին, ով այդ լուրը հասցրել էր իրեն, Էյնշտեյնն անհայտ պատճառով թեյավճարի փոխարեն տվել էր գերմաներենով երկու գրություն։
Գրություններում շարադրված է եղել «երջանիկ կյանքի տեսությունը»։ «Իմպերիալ Տոկիո» հյուրարոցի բլանկի վրա արված գրություններից մեկում ասվում է, որ «Խաղաղ և համեստ կյանքն ավելի մեծ ուրախություն է բերում, քան հաջողության ձգտումը, որը կապված է մշտական անհանգստության հետ»։ Մյուսը պարունակում է հետևյալ տեքստը. «Այնտեղ, որտեղ կա կամք, միջոցներ գտնվում են»։
Աճուրդը կկայանա հոկտեմբերի 24-ին։ Այն կանցկացնի Winner’s Auctions & Exhibitions աճուրդի տունը։