ԱՄՆ Կենտրոնական հետախուզական վարչության տնօրեն Մայք Պոմպեոն պատմել է այն մասին, որ Հյուսիսային Կորեայի առաջնորդ Կիմ Չեն Ինը կարող է սպանվել։ Դրա հետ մեկտեղ Պոմպեոն պարզաբանել է, որ ԿՀՎ-ն հյուսիսկորեացի առաջնորդին համարում է ռացիոնալ կառավարիչ, ով կենտրոնացած է այն բանի վրա, որպեսզի մնա իշխանության ղեկին և «ամեն օր քնի սեփական անկողնում»։ Սակայն եթե Կիմը հանկարծ չհայտնվի աշխատանքի, դրա մասին ԱՄՆ-ին հարցնելու իմաստ չկա, հավելել է Պոմպեոն։
«Ինչ վերաբերվում է իրավիճակին, եթե Կիմ Չեն Ինը հանկարծակի անհետանա, հաշվի առնելով ԿՀՎ պատմությունը, ես պարզապես չեմ խոսի այդ մասին»,-ասել է Պոմպեոն, երբ նրան հարցրել են, թե ինչ տեղի կունենա, եթե Կիմը հանկարծ մահանա։
Պոմպեոն նաև խոստովանել է, որ ԱՄՆ-ը կարծում է, որ Հյուսիային Կորեան շատ մոտ է սեփական միջուկային հրթիռ ունենալուն, որն ունակ է խոցել ամերիկյան ռազմավարական օբյեկտները, փոխանցում է South China Morning Post պարբերականը։
Նա հավելել է, որ Թրամփը նախընտրում է կիրառել պատժամիջոցներն ու դիվանագիտությունը՝ ստիպելու Կիմ Չեն Ինին նստել բանակցային սեղանի շուրջ և քննարկել զինաթափումը։ Պոմպեոյի խոսքով՝ ԱՄՆ-ի կողմից ռազմական ուժի կիրառումը դեռևս մնում է խնդրի լուծման տարբերակ։
