Վրաստանի ԿԸՀ-ն շարունակում է երեկ կայացած ՏԻՄ ընտրությունների արդյունքների հաշվարկը։ Ինչպես հայտնում է Interfax-ը, հաշվարկվել են Քութայիսի և Բաթում քաղաքներում անցկացված քվեարկության արդյունքները, որտեղ քաղաքացիները քաղաքապետեր են ընտրել։
Քութայիսիում հաշվարկվել են քվեարկության արդյունքները 124 ընտրատեղամասերից 39-ում։ ԿԸՀ տվյալներով՝ առաջատար է իշխող «Վրացական երազանք» կուսակցությունից քաղաքապետի թեկնածու Գեորգի Չիգվարիան։ Նախնական տվյալներով՝ նրա օգտին է քվեարկել ընտրողների 48.61 տոկոսը։ Երկրորդ տեղում ընդդիմադիր «Միացյալ ազգային շարժման» թեկնածու Գրիգոլ Վարշաձեն է՝ 27.16 տոկոս ձայնով։
Բաթում քաղաքում 103 ընտատեղամասերից 32-ում քվեարկության արդյունքների հաշվարկից հետո առաջատար է իշխող կուսակցության թեկնածու Լաշա Կոմախիձեն՝ 54.86 տոկոս ձայնով։ Երկրորդ տեղում «Միացյալ ազգային շաժման» թեկնածուն Լևան Անտաձեն է՝ 25.86 տոկոս ձայնով։
Հաղթանակի համար թեկնածուն պետք է հավաքի ընտրողների ձայների ավելի քան 50 տոկոսը, այլապես երկրորդ փուլ կնշանակվի։
ՏԻՄ ընտրություններին մասնակցել են 22 կուսակցությունների, 5 ընտրական բլոկների և 1 նախաձեռնողական խմբի ներկայացուցիչները։