Կատալոնիայի կառավարության ղեկավար Կառլես Պուչդեմոնը հայտարարել է, որ Կատալոնիայի կարգավիճակի փոփոխությանն ուղղված՝ Իսպանիայի կառավարության գործողություններն անհամատեղելի են օրենքի գերակայության հետ: Այս մասին հայտնում է Reuters-ը:
Պուչդեմոնը Կատալոնիայի խորհրդարանին կոչ է արել նիստ գումարել «ինքնակառավարումը և ժողովրդավարությունը վերացնելու փորձերը» քննարկելու համար: «Նրան, ինչ մենք ունենք, հասել ենք ժողովրդի և ժողովրդավարության օգնությամբ, մենք չենք կարող համաձայնվել այդ հարձակմանը»,-ասել է նա:
Այսօր Իսպանիայի իշխանությունները սկսել են Կատալոնիայում ուղղակի կառավարում սահմանելու գործընթացը: Ինչպես շաբաթ օրը հայտարարել էր վարչապետ Մարիանո Ռախոյը՝ շրջանի կառավարությունը կլուծարվի, խորհրդարանական արտահերթ ընտրություններ կանցկացվեն ոչ ուշ, քան կես տարի անց: Մինչ այդ Կատալոնիան կղեկավարի Մադրիդի նշանակած ներկայացուցիչը: