Լեհաստանի արտգործնախարար Վիտոլդ Վաշչիկովսկին հույս ունի, որ Հայաստանի և Լեհաստանի համագործակցությունը կշարունակվի զարգանալ ամենաբարձր մակարդակով տարբեր ոլորտներում: Նա այս մասին ասաց Հայաստանի արտգործնախարար Էդվարդ Նալբանդյանի հետ համատեղ ասուլիսի շրջանակում:
«Սա իմ առաջին այցն է Երևան որպես նախարար, տարիներ առաջ էր կայացել արտգործնախարարի այցը, և արդեն ժամանակն էր: Ուրախ եմ, որ երկու երկրների նախագահները հնարավորություն ունեցան հանդիպել և քննարկումներ ունենալ նախորդ ամիս Նյու Յորքում ՄԱԿ-ի գլխավոր ասամբլեայի շրջանակում: Իսկապես ներուժ կա համագործակցությունը զարգացնելու համար, հատկապես տնտեսական ոլորտում: Մեր քննարկումների հաջորդ մասում ես կներկայացնեմ, թե ինչ լեհական ընկերություններ են շահագրգռվածություն հայտնել համագործակցելու հայկական ընկերությունների հետ»,-ասաց նա:
Արտգործնախարարի խոսքով՝ քննարկումները չեն սահմանափակվել միայն երկկողմ հարաբերություններով:
«Ես այստեղ եմ որպես ՆԱՏՕ-ի անդամ երկրի ներկայացուցիչ: Մենք քննարկեցինք նաև անվտանգության խնդիրներ, ինչպես նաև հարցեր, որոնք առնչվում են Արևելյան գործընկերության առաջիկա գագաթնաժողովին, որը պատրաստվում ենք անցկացնել արդեն հաջորդ ամիս: Մեր առաջարկով այն կկայանա Բրյուսելում, որպեսզի կարողանանք կենտրոնացնել եվրոպական բոլոր երկրների ուշադրությունը: Նախարարի հետ քննարկել ենք նաև Արևելյան գործընկերության ծրագրերի բարելավման հարցը, որը բխում է երկու երկրների շահերից»,-ընդգծեց Վիտոլդ Վաշչիկովսկին:
Նա հավելեց, որ պատրաստվում են նաև առաջիկա ՆԱՏՕ-ի գագաթնաժողովին, որը հավանաբար տեղի կունենա հաջորդ տարվա մայիսին:
«Այս շրջանակում լիարժեք աշխատանք է իրականացվում ՆԱՏՕ-ի կողմից, այն մշտադիտարկում է մարտահրավերները բոլոր ուղղություններով: Եվ ես նաև այստեղ եմ, որպեսզի լսեմ հայ քաղաքական գործիչների մտահոգությունները՝ կապված Կովկասում անվտանգության խնդիրների հետ»,-եզրափակեց Լեհաստանի արտգործնախարարը:
Լուսանկարը՝ Photolure-ի