Եվրախորհրդարանի ներքին գործերով կոմիտեն հոտեմբերի 19-ին 43 կողմ, 16 դեմ ձայներով կողմ է քվեարկել փախստականների տեղաբաշխման ավտոմատ համակարգի օգտին: Այն հիմնված է որոշակի ֆիքսված չափանիշերի հանրագումարի վրա: Այսուհետ միգրանտների թիվը, որ պետք է ընդունի ԵՄ այս կամ այն երկիրը, ուղղակիորեն կախված կլինի սեփական բնակչության թվից և պետության տնտեսական ցուցանիշերից, հայտնում է Deutsche Welle-ը:
Այդպիսով Եվրախորհրդարանը հանդես է եկել հօգուտ ներկայումս գործող Դուբլինի համաձայնագրից հրաժարվելու, որի համաձայն՝ ապաստան տրամադրելու հարցը պետք է քննարկվի այն պետության ներգաղթի ծառայությունների կողմից, որտեղ միգրանտն առաջին անգամ ապաստանի հայտ է ներկայացրել կամ առաջին անգամ մտել է ԵՄ հող:
Ներքին գործերի կոմիտեի մշակած առաջարկները պետք է աջակցություն ստանան նաև Եվրախորհրդարանի նիստում, հետո դրանք կփոխանցվեն ԵՄ Նախարարների խորհրդի քննարկմանը: