«Կովկասի չկարգավորված հակամարտությունները սպառնալիք են տարածաշրջանային անվտանգության համար»,- երեկ հայտարարել է Ադրբեջանի ԱԳՆ ղեկավար Էլմար Մամեդյարովը Թբիլիսիում՝ Վրաստանի ԱԳՆ ղեկավար Գրիգոլ Վաշաձեի հետ համատեղ մամլո ասուլիսում: «Մենք քննարկեցինք երկու երկրների համար հետաքրքրություն ներկայացնող հարցերը: Մենք հանգամանորեն քննարկեցինք չկարգավորված հակամարտությունները, Լեռնային Ղարաբաղի հակամարտությունը, խոսեցինք այն մասին, թե ինչպես են դրանք կապված տարածաշրջանային անվտանգության հետ: Վաշաձեն տեղեկություններ տրամադրեց Աբխազիայի ու Հարավայի Օսիայի մասին»,-ասել է Մամեդյարովը: Ըստ Մամեդյարովի՝ հանդիպմանը քննարկվել են նաև էներգետիկ հարցեր: «Կան խոշոր ենթակառուցվածքային նախագծեր, որոնց ակտիվ մասնակցում են Ադրբեջանն ու Վրաստանը: Բաքու-Թբիլիսի-Կարս երկաթուղին նախատեսվում է շահագործման հանձնել 2012թ. վերջում, կամ 2013թ. սկզբին»,-ասել է Ադրբեջանի ԱԳՆ ղեկավարը:
Է.Մամեդյարովը Թբիլիսիում նաեւ հայտարարել է, որ Բաքուն ԼՂ կարգավորման գործընթացում սպասում է Երեւանի պատասխանին՝ Մադրիդյան պլանի վերաբերյալ: Ըստ նրա՝ խոսքն այն ծրագրի մասին է, որ 2007թ. ԱՄՆ, Ֆրանսիայի եւ Ռուսաստանի միջնորդությամբ համաձայնեցվել է Ադրբեջանի եւ Հայաստանի նախագահների հանդիպմանը: Նախարարն ընդգծել է, թե այդ ծրագիրը հանձնվել է ադրբեջանական կողմին, որը պատասխան է ներկայացրել դեռ անցած տարվա դեկտեմբերին: «Հայկական կողմը, սակայն, չի ներկայացրել իր պատասխանը: Մինչեւ Աստանայում ԵԱՀԿ գագաթնաժողովը մնացել է մեկ ամիս, տեսնենք»,- ասել է նա: