«Ընդհանրապես որևէ զարգացման տեսլական հնարավոր չէ առանց կրթության մասին լուրջ պատկերացումների: Բոլոր այն մարդիկ, ովքեր աշխատում են այդ տեսլականի վրա կամ փորձում են ձևակերպել այդ տեսլականը իրենց համար կամ ավելի լայն հասարակության համար, բոլորն էլ հասկանում են, որ դրա տակ պետք է դրված լինեն լուրջ կրթական գործընթացներ: Ինչ վերաբերում է մեր կրթության մրցունակությանը, մենք հանրակրթության մեջ արդեն որոշակի հավակնություններ ձևակերպել ենք: Վստահ եմ, որ այդ հավակնությունները բերելու են և՛ որակական, և՛ քանակական արդյունքների»,- «Առաջին լրատվական»-ի հետ զրույցում ասաց «Այբ» կրթահամալիրի հոգաբարձուների խորհրդի նախագահ Տեր Մեսրոպ քահանա Արամյանը:
Նրա խոսքերով՝ էլիտարիզմը մեծ վտանգ է կրթության համար. «Այն, ինչ մենք անում ենք, չենք անում նեղ խմբի համար, անում ենք, որպեսզի դա հասանելի լինի բոլորին, որ յուրաքանչյուր ոք կարողանա այդ ծրագրերից օգտվել»,- ասաց նա:
Տեր Մեսրոպի խոսքերով՝ հանրակրթության մեջ արդեն ունենք ձևակերպված հավակնություններ: Նա վստահ է, որ առաջիկա տասնամյակում կարող ենք գոնե հանրակրթությամբ աշխարհի առաջատար ազգերի կողքին կանգնել:
Ինչ վերաբերում է բարձրագույն կրթությանը, ապա, նրա դիտարկմամբ, այստեղ կարիք կա իսկապես նոր հավակնություն ձևակերպելու. «Վերջերս մենք մեր երկրի բարձրագույն իշխանությանը ներկայացրել ենք նոր տեխնոլոգիական համալսարանի կոնցեպցիան, և այն հիմա վերջնական լրամշակման փուլում է, այնուհետև պետք է հաստատվի կառավարության կողմից, և այնուհետև մենք սկսելու ենք բանակցությունները մեր միջազգային գործընկերների հետ, որպեսզի կարողանանք նոր համալսարանի գաղափարն իրագործել: Մեր նպատակն է, որպեսզի երիտասարդները ցանկանան մնալ և սովորել Հայաստանում, որպեսզի Հայաստանը ունենա ուժեղ ձգողականություն բարձրագույն ոլորտում: Եվ ոչ միայն այդ: Մենք ուզում ենք ստեղծել այնպիսի մի բան, որ սփյուռքահայ երիտասարդները ցանկանան գան սովորեն Հայաստանում, նաև օտարերկրացի տաղանդներ, պայծառ ուղեղներ կարողանանք ձգենք դեպի Հայաստան»,- հավելեց նա:
Նա նաև նշեց, որ մենք փողի պակաս չունենք, ունենք ուժեղ գաղափարների և մեծ հավակնությունների պակաս: «40 թվին 4 միլիոն ունենալը չափավոր և համեստ տեսլական է, չեմ պատկերացնում, որ հինգ միլիոնից ներքև բնակչությամբ կարողանանք լուծել խնդիրների այն բազմությունը, որ կա մեր առջև դրված»,- ասաց նա
Հարցազրույցն ամբողջությամբ՝ տեսանյութում: