«Մեր հանձնաժողովն այնքանով է առնչվում գնագոյացման խնդիրներին, որքանով դա վերաբերում է բարձր կենտրոնացվածություն ունեցող շուկաներին»,- անդրադառնալով կարագի և բենզինի թանկացմանը՝ «Առաջին լրատվական»-ի հետ զրույցում ասաց ՏՄՊՊՀ նախագահ Արտակ Շաբոյանը:
Նրա խոսքերով՝ ՏՄՊՊՀ-ն գների վերահսկողություն չի իրականացնում. «Մենք այդպիսի լիազորություն չունենք։ Ամբողջ աշխարհում մրցակցության պաշտպանության մարմինները գների կարգավորմամբ չեն զբաղվում, գներն ազատ են»։
Շաբոյանն ընդգծեց, որ ՏՄՊՊՀ-ն զբաղվում է միայն այն շուկաներով, որտեղ կան գերիշխող դիրք գրավողներ, որոնք կարող են իրենց մրցակցային առավելություններից օգտվելով չարաշահումներ կատարել. «Այդ առումով երկու շուկա կա, որ գտնվում է մեր ուշադրության կենտրոնում՝ բենզինի և կարագի։ Բենզինի շուկայում երեք ներկրող ընկերություն ունենք՝ CPS-ը, «Ֆլեշը» և «Մաքս պետրոլ գրուպը»։ Սեպտեմբերին բենզինի գները բարձրացել են 20 դրամով, և երբ ուսումնասիրում ենք, տեսնում ենք, որ ներկրման գները ևս նույնքան թանկացել են։ Նույն երևույթը տեղի է ունենում Ռուսաստանում, Վրաստանում, որտեղ բենզինը թանկացել է 7-8 տոկոսով։ Մեր ուսումնասիրությունները ցույց են տալիս, որ բենզինի գների բարձրացումն ամբողջությամբ պայմանավորված է ձեռքբերման գների բարձրացմամբ»։
Ինչ վերաբերում է կարագի շուկային, այստեղ, ըստ Շաբոյանի, կան շուրջ 40 ներկրողներ, բայց մեկ խոշոր ընկերություն կա, որ գերիշխող դիրք ունի, դա «Ալեքս Հոլդինգն» է։ «Ուսումնասիրել ենք այդ ընկերության գործունեությունը. Այս տարվա ընթացքում կարագը թանկացել է շուրջ 35 տոկոսով, բայց կարագի գները սկսել են բարձրանալ նախորդ տարվա սեպտեմբերից։ Եթե այդ ժամանակվանից հաշվենք, ապա կարագը թանկացել է 53 տոկոսով»։ Շաբոյանը նշեց, որ «Ալեքս Հոլդինգը» կարագը ներկրում է նորզելանդական «Ֆոնտրեա» ընկերությունից, որի մոտ գները բարձրացել են մոտ 80 տոկոսով։
