Ցանկացած բռնություն ինձ համար անընդունելի է։ Այդ մասին «Առաջին լրատվական»-ի հետ զրույցում նշեց ՀՀԿ խմբակցության պատգամավոր, «Քեթրին Գրուպ»-ի սեփականատեր Միհրան Պողոսյանը՝ անդրադառնալով փաստին, որ օֆշորային սկանդալը բացահայտած լրագրողը, սկանդալ, որտեղ շրջանառվում էր նաև իր անունը, վերջերս սպանվել է։
Անդրադառնալով հրապարակումներին, որ Քանաքեռ-Զեյթուն վարչական շրջանում նշանակված նոր ղեկավարն իր մտերիմներից է, Միհրան Պողոսյանն ասաց. «Քանաքեռ-Զեյթուն համայնքը միշտ եղել է մեզ համար հոգեհարազատ համայնք, որովհետև «Քեթրին» հասարակական կազմակերպությունը արդեն 18 տարի զբաղվում է բարեգործական միջոցառումներով։ Բնականաբար, ինձ համար չի կարող միևնույն լինել, թե ով կղեկավարի վարչական շրջանը։ Դրանով պայմանավորված, կարող եմ ասել, որ և՛ Արթուր Ստեփանյանը, և՛ Արտակ Հանեսյանը, լավ ղեկավարներ են»։
Հարցին՝ թե այդ նշանակման հարցում եղե՞լ է իր միջամտությունը, Միհրան Պողոսյանն արձագանքեց. «Ոչ թե միջամտությունը, այլ իմ առաջարկությունը կար։ Ինչու չէ, ես նաև իմ դիրքորոշումն եմ ասել, որ Արթուր Ստեփանյանը լավ ղեկավար է, և հանրությունը դա կտեսնի։ Արտակ Հանեսյանը ևս եղել է շատ լավ ղեկավար»։
Ինչ վերաբերում է մամուլի հրապարակումներին, թե Միհրան Պողոսյանը ցանկանում է համայնք առ համայնք գրավել քաղաքը, նա պատասխանեց. «Միհրան Պողոսյանը ոչ մի բան գրավելու կարիք չունի։ Միհրան Պողոսյանն ընտրված պատգամավոր է, և իր գործառույթներով է զբաղվում»։