Ամերիկայի Միացյալ Նահանգների Վաշինգտոն քաղաքում հոկտեմբերի 12-15-ը տեղի է ունեցել Արժույթի միջազգային հիմնադրամի (ԱՄՀ) և Համաշխարհային բանկի խմբի տարեկան ժողովը, որին մասնակցել են Հայաստանի Հանրապետության փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը, ֆինանսների նախարար Վարդան Արամյանը և Կենտրոնական բանկի նախագահ Արթուր Ջավադյանը: Համաշխարհային բանկի և Արժույթի միջազգային հիմնադրամի տարեկան ժողովի շրջանակներում տեղի են ունեցել տնտեսական կարևորություն ներկայացնող մի շարք հանդիպումներ:
Վարչապետ Կարեն Կարապետյանը ԱՄՆ չի մեկնել, հանդիպումներից ոչ մեկին չի մասնակցել: Փորձեցինք նրա մամուլի խոսնակ Արամ Արարատյանից ճշտել՝ ինչո՞ւ: Արամ Արարատյանը ընդգծեց, որ իրականում անհրաժեշտություն չի տեսնում մեկնաբանելու, թե ինչու Կարեն Կարապետյանը չի մասնակցել այս կամ այն հանդիպմանը:
«Վարչապետն ունի հստակ օրակարգ, այդ թվում՝ օտարերկրյա այցերի, որով և առաջնորդվում է: Վաշինգտոնում Հայաստանը ներկայացնում է կոմպետենտ ու բանիմաց թիմ, որի պրոֆեսիոնալիզմը և երկրի շահերը ներկայացնելու ունակությունները որևէ մեկը կասկածի տակ դնել չի կարող: Այսքանով կարծես թե կարելի էր սահմանափակվել, սակայն, հաշվի առնելով հարցի ենթատեքստը և Ձեր կայքում վերջերս վարչապետի այցերի աշխարհագրության շուրջ արված «վերլուծությունները», ավելացնեմ, որ Կարեն Կարապետյանը հստակ արտահայտել է իր մոտեցումն այդ հարցի վերաբերյալ Ազգային ժողովում սեպտեմբերի 13-ին տեղի ունեցած հարցուպատասխանի ժամանակ, այնպես որ՝ այստեղ ես կամ առավել ևս՝ ուրիշները լրացնելու որևէ բան չունեն»,- շեշտեց նա:
Հիշեցնենք, որ ԱԺ-ում Ելք» խմբակցության պատգամավոր Էդմոն Մարուքյանի հարցին, թե ինչու չի այցելում արևմտյան երկրներ՝ չե՞ն հրավիրում, թե՞ հրավիրում են, ինքը չի գնում, վարչապետը պատասխանել էր. «Մոտակա ժամանակերս կլինեն այդպիսի այցեր. այցը կլինի այն ժամանակ, երբ կունենանք օրակարգ և առարկայական թեմա, որպեսզի այցը չվերածվի տուրիզմի: Մենք, լինելով ԵՏՄ անդամ, այլ շուկաների նկատմամբ թերուշադրություն չունենք»:
Հիշեցնենք. չնայած այս կառավարության անդամները, վարչապետը խոսում են 4,3 տոկոս տնտեսական աճ ունենալու մասին՝ ԱՄՀ զեկույցում նշվում է, որ 2017թ. Հայաստանի համար կարելի է կանխատեսել հազիվ 3.5 տոկոս աճ, իսկ 2018թ.՝ 2.9 տոկոս աճ: