«Հայկական ժամանակ» թերթը գրում է. «Չնայած գրիպի սեզոնն արդեն սկսվել է, Հայաստանում, այդ վիրուսը դեռևս չի շրջանառում:
Առողջապահության համաշխարհային կազմակերպության կանխատեսումների համաձայն, այս տարի սեզոնին հատուկ է լինելու գրիպի AH1 տարատեսակը, որն ի հայտ է եկել տարիներ առաջ և ստացել «խոզագրիպ» անվանումը:
«Ըստ ԱՀԿ կանխատեսումների, որոնց մասին վկայում են նաև Ռուսաստանի Դաշնության համապատասխան ծառայությունների հայտարարությունները, այս տարի հավանական էր, որ գրիպի սեզոնը կլինի AH1-ով պայմանավորված: Բայց դեռևս մեզ մոտ հարուցիչներ շրջանառության մեջ չկան: Մեզ մոտ հիմնականում շրջանառում են այլ շնչառական վարակների հարուցիչներ: Դրանք են՝ ռինովիրուսներ, պարագրիպ և մետապնևմովիրուսներ: Դրանք հիմնականոմ առաջացնում են գրիպանման երևույթներ, ունեն հարաբերականորեն թեթև ընթաք: Իհարկե, առավել խոցելի էլի երեխաներն են: Եթե մեծահասակները կարողանում են հիվանդությունը ոտքի վրա անցկացնել, երեխաների մոտ մի քիչ երկարատև է լինում, և կարող են նաև բարդություններ առաջանալ»,- armtimes.com-ին ասաց ՀՀ առողջապահության նախարարության վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը:
Անդրադառնալով սպասվող «խոզագրիպին»՝ նա հիշեցրերց, որ դեռևս 2010 թվականին այն դասվել է մարդուն հատուկ գրիպի շարքին:
«Կապ չունի՝ որ ենթատեսակն է, գրիպն ունի նույն ախտանշանները, նույն արտահայտվածությունը և կախված օրգանիզմի վիճակից՝ կարող է լինել բարդություն, կարող է չլինել»,- նկատեց մասնագետը»:
Առավել մանրամասն՝ թերթի այսօրվա համարում:
