«Ազատ դեմոկրատներ» կուսակցության նախագահ Խաչատուր Քոքոբելյանը լիահույս է, որ առաջիկայում կստորագրվի Հայաստան-ԵՄ նոր համաձայնագիրը: «Հուսանք, որ թե՛ ԵՄ-ն, թե՛ ՀՀ իշխանությունը, թե՛ քաղաքացիական հասարակությունը և թե՛ քաղաքական ուժերը պետք է միահամուռ հետևողական լինեն, որ չվիժեցվի այս պայմանագրի ստորագրումը: Այնպես որ, սա էապես կարևոր պայմանագիր է ՀՀ համար»,- ասաց Խաչատուր Քոքոբելյանը:
Որոշ գործիչներ, նրա խոսքերով, փորձում են գտնել նույնիսկ այն, ինչ չկա պայմանագրի ներսում: Նա առանձնացնում է էներգետիկայի, անվտանգության, կրթության, մշակույթի, տնտեսական մասերը:
«Ակնհատ է, որ այս պայմանագիրն այն չէ, ինչ խոր և համապարփակ պայմանագիրը, բայց այս պայմանագրում քաղաքական մասը պահպանված է, սա էական խնդիր է, ապագայի համար գործիքակազմ է տալու, որ մենք շարունակենք, և նաև հնարավորություն է տալու, որ Հայաստանը, բառիս բուն իմաստով, հնարավորություն կունենա ազդեցություն ունենալ եվրոպական քաղաքականության վրա»,- ասաց նա:
Խաչատուր Քոքոբելյանը նշեց պայմանագրի կարևորագույն դրույթները. այս պայմանագրով Հայաստանը հանձնառություն է առնում՝ հայկական օրենսդրությունը պետք է մոտարկվի եվրոպական օրենսդրությանը՝ բիզնես ոլորտում, մարդու իրավունքների, անվտանգության, էներգետիկ, կրթության ոլորտներում:
Նրա խոսքերով՝ պայմանագրի տեքստը հրապարակվել է եվրոպացիների կողմից՝ ոչ որպես խոչընդոտ, այլ, ընդհակառակը. «Այդ ոչ ադեկվատ հատվածը, որ ներկայացնում էր՝ փորձելով սա կապել տարբեր ոչ էական հարցերի հետ, նրանց համար էլ հասկանալի կլինի: Նրանք պղտոր ջրում փորձում են ձուկ որսալ»:
Հարցազրույցն ամբողջությամբ՝ տեսանյութում: