ՄԱԿ-ի գլխավոր քարտուղար Անտոնիու Գուտերեշը ողջունել է Հայաստանի և Ադրբեջանի նախագահների հանդիպման արդյունքները և կոչ արել երկու երկրներին զարգացնել այդ հաջողությունը՝ ԼՂ հակամարտության խաղաղ կարգավորման հասնելու համար:
«ՄԱԿ-ի գլխավոր քարտուղարը ոգևորված է, որ նախագահները համաձայնել են միջոցներ ձեռնարկել բանակցային գործընթացի ակտիվացման նպատակով և հավելյալ քայլեր կատարել շփման գծում լարվածությունը նվազեցնելու համար»,- նշված է գլխավոր քարտուղարի պաշտոնական ներկայացուցիչ Ստեֆան Դյուժարիկի հայտարարության մեջ:
«ՄԱԿ-ն աջակցում է ԵԱՀԿ Մինսկի խմբի համանախագահների միջնորդական ջանքերին»,-ասել է Գուտերեշը՝ հորդորելով կողմերին օգտվել գագաթնաժողովի շնորհիվ ձևավորված դրական դինամիկայից՝ ԼՂ հակամարտության խաղաղ բանակցային կարգավորման հասնելու համար։