Գլոբալիզացիայի և տարածաշրջանային համագործակցության վերլուծական կենտրոնի նախագահ, միջազգայնագետ Ստեփան Գրիգորյանի կարծիքով՝ Հայաստան-Եվրամիություն «Համապարփակ և ընդլայնված գործընկերության համաձայնագրի» հրապարակման որոշիչ հանգամանքն այն է, որ այդ տեքստը ծանոթ լինի Ռուսաստանին: «2013-ին ասում էին՝ Ռուսաստանը դեմ է, որովհետև տեքստը գաղտնի է։ Այս մտահոգություններից ազատվելու համար պետք էր հրապարակել»,- «Առաջին լրատվական»-ի հետ զրույցում ասաց Ս. Գրիգորյանը։
Մեր զրուցակիցը միևնույն ժամանակ կարծում է, որ առ այսօր Ռուսաստանը չի ուզում, որ մենք ստորագրենք այդ համաձայնագիրը. «Իրենք չեն ուզում, որ մենք ստորագրենք, ուզում են՝ իրենց կցորդը մնանք։ Դեռ 1.5 ամիս կա՝ պետք է որ հասցնենք։ Այն, որ տեսակետներ են տարածվում՝ տեխնիկական խնդիրներ կան, դա սողանք են թողում, որ ասենք՝ եվրոպացիները չեն հասցնում։ Բայց ես ճիշտ չեմ համարում այդ միտքն օգտագործել, որովհետև բոլորը կհասկանան, որ դա հնարք է»։
Եթե չստորագրենք՝ ի՞նչ կլինի Հայաստան պետության և Հայաստան-Եվրամիություն հարաբերությունների հետ առհասարակ՝ հարցին ի պատասխան միջազգայնագետն ասաց. «Այսպես ասեմ՝ գլոբուսից դուրս կթռնենք։ Կա անձնական խնդիր՝ Սարգսյանի և Նալբանդյանի հետ կապված. եթե չստորագրեն՝ ոչ միայն քաղաքականությունից պետք է դուրս գան, այլև ընդհանրապես՝ մի տեղ գնան պախկվեն։ ԱլԳ նախարարները ոչ մի տեղ չեն գնալու՝ շարունակելու են պաշտոնավարել, այդ դահլիճ ո՞նց է մտնելու Նալբանդյանը։ Չեմ ուզում վատ սցենարների մեջ լուրջ խորանալ, հուսով եմ՝ իշխանությունները հասկանում են ու կստորագրեն։ Ես կատակ չեմ անում՝ ոչ միայն որպես գործընկեր, այլև որպես պետություն աշխարհում այլևս չենք դիտարկվի»։
Հարցազրույցն ամբողջությամբ՝ մեր տեսանյութում:
