Այն, որ քաղաքական ուժերը չեն մասնակցում ՏԻՄ ընտրություններին, պատճառը մեր քաղաքական կյանքի աբստրակտությունն է։ Այդ մասին «Առաջին լրատվական»-ի հետ զրույցում նշել է հրապարակախոս Արա Նեդոլյանը։
Նրա խոսքերով՝ այսօր քաղաքական կյանքը կարող է կայանալ միայն Ազատության հրապարակում և կարող է կայանալ միայն շատ աբստրակտ, ընդհանուր ձևակերպված հարցերի շուրջ։
«Քաղաքական ուժերն իրենց ծրագրերում չեն իջնում առօրյա կյանք, իսկ ծրագիր նշանակում է առօրյա բոլոր ցավոտ հարցերը գիտակցել և կարողանալ լուծման ձևեր առաջարկել։ Դրանից հետո արդեն կարելի է գործել Երևանի կենտրոնից դուրս։
Այսինքն՝ ես այդ երկուսն իրար եմ կապում, թե ինչու չեն ստեղծվում շատ կոնկրետ փոփոխությունների ծրագրեր, որոնք կկարողանան պատասխանել ոլորտ առ ոլորտ առաջացած աղետին»։
Նեդոլյանը նշեց, որ սովորաբար մարդը կայանում է ինչ-որ ոլորտում, և եթե ոլորտները 90 տոկոսով մեռած են կամ կեղծ՝ մարդը կարող է կայանալ միայն շատ նեղ, ընտանեկան շրջանակում. «Դա գիտակցելով, նա լքում է երկիրը։ Ու քանի որ քաղաքական ուժերը, կարծես, չեն գիտակցում, որ իրենց խնդիրը ոչ թե իշխանափոխությունն է, այլ առօրյայի փոփոխությունը, բոլոր ոլորտների վերակենդանացումը, ապա նրանք չեն էլ գիտակցում, թե ինչ պետք է անել տեղական մակարդակով, ինչով գրավել մարդկանց։ Տեղական մակարդակում մարդկանց ինչ-որ աբստրակտ գաղափարներով գրավել հնարավոր չէ, պետք է տալ շատ կոնկրետ ծրագրեր ու հեռանկարներ, որոնք չկան։ Դրա համար էլ, գիտակցելով, որ առօրեական հարցերի պատասխանները չկան, քաղաքական դիսկուրսը և ինստիտուցիաները չեն ձևավորում, իրենք խուսափում են ամեն ինչից, բացի՝ գուցե Երևանի կենտրոնի Ազատության հրապարակից»։
Դիտարկմանը, թե դրանով չի՞ բարդանում 2022 թվականին խորհրդարանական ընտրություններին քաղաքական ուժերի հաջողության հասնելու հավանականությունը, Նեդոլյանն արձագանքեց. «Աբստրակտ գաղափարներով երևի թե կարելի է մասնակցել ընտրությունների, բայց չի կարելի հասնել բեկման, չի կարելի գալ իշխանության։ Ես չեմ կարող ասել, թե քանի տոկոս կստանան նրանք, բայց գիտեմ, որ առօրյա կյանքի բեկման հարցը դրված չէ, ու շատ քիչ է իշխանության գալու հավանականությունը, իսկ եթե մի հրաշքով դա տեղի ունենա, քիչ է հավանակությունը, որ դա կլինի իսկապես կյանքի փոփոխություն»։
Հարցազրույցն ամբողջությամբ՝ տեսանյութում։