Թուրքիայի Առևտրային-արդյունաբերական պալատն իսկապես թողարկել է շրջաբերական, որը Ղրիմից եկող նավերին արգելում է մուտք գործել երկրի նավահանգիստներ։
Այդ մասին TASS-ի հետ զրույցում հայտարարել է կազմակերպության ներկայացուցիչը։ Նրա խոսքերով՝ արգելվել է յուրաքանչյուր դրոշի ներքո գործող նավերի մուտքը։
Գործակալության զրուցակիցը հայտնել է, որ համապատասխան որոշումն ընդունել է Թուրքիայի տրանսպորտի, նավագնացության ու հաղորդակցությունների նախարարությունը։
Նախօրեին շրջաբերականի պատճենը Facebook-ում տեղադրել է Ուկրաինայի գլխավոր դատախազի մամլո քարտուղար Լարիսա Սարգանը։
Հոկտեմբերի 9-ին Թուրքիայի նախագահ Ռեջեփ Էրդողանը Ուկրաինայի նախագահ Պյոտր Պորոշենկոյի հետ համատեղ մամուլի ասուլիսի ժամանակ հայտարարել է, որ Անկարան Ղրիմը համարում է Ուկրաինայի տարածք։