Ֆիլիպինների նախագահ Ռոդրիգո Դուտերտեն պատմել է զինվորականներին, որ Ռուսաստանը Ֆիլիպիններին կարող է անվճար տրամադրել զենք, բեռնատարներ և զինամթերք, որպեսզի երկիրը կարողանա պայքարել ԴԱԻՇ-ի ահաբեկիչների դեմ, փոխանցում է Reuters գործակալությունը։
Դուտերտեն ասել է, որ Ռուսաստանը կմատակարարի մոտ 5000 ինքնաձիգներ, և ֆիլիպինցի զինվորականներն այլևս ստիպված չեն լինի հին զենք կիրառել։ «Մենք կունենանք «Կալաշնիկովներ»»,-ասել է նա՝ դիմելով զինվորականներին։
Նա հավելել է, որ Ռուսաստանը ցանկացել է այդ նվերը գաղտնի պահել, սակայն ինքը որոշել է հայտնել դրա մասին, քանի որ միևնույնն է՝ վերջիվերջո դրա մասին հայտնի կդառնա։
Դուտերտեն հավելել է, որ ԶՈՒ-ն զինվել է ընդդեմ ԴԱԻՇ-ի ահաբեկիչների, ովքեր հիմնվել են երկրի հարավի Մինդանաո կղզում։
Երկրի պաշտպանության նախարար Դելֆին Լորենցանան հայտնել է, որ ռուսական զենքը Ֆիլիպիններ կբերվի հոկտեմբերի 22-ին։ Դրանք Մանիլա կտեղափոխեն 5 ռուսական ռազմանավեր։