«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, «Ազատամարտիկների դաշինքը» պատրաստվում էր նիստ անցկացնել և հետագա անելիքները քննարկել։ Արդյոք արդեն կա՞ հստակեցում այդ առումով։
– Մենք ամեն երեքշաբթի՝ խորհրդի, իսկ չորեքշաբթի օրերին վարչության մեր ավանդական նիստերն անցկացնում ենք։ Ամռանը՝ արձակուրդային սեզոնի հետ կապված, որոշակի դադար կար, այժմ վերսկսել ենք։ Հենց այսօր էլ այս պահին նիստն ընթանում է՝ ես պարզապես տեխնիկական, անձնական պատճառներով այսօր չեմ մասնակցում։
Նիստերի ընթացքում հիմնականում քննարկվում են մեր մարտական ընկերների սոցիալական խնդիրները, նրանց կարգավիճակի, զինգրքույկների հարցերը։ Մենք այս պահի դրությամբ հիմնականում կենտրոնացած ենք այդ հարցերի վրա՝ բանակաշինության և ռազմական ուղղություններով։
– Իսկ քաղաքական դաշտում այլևս ձեզ չե՞նք տեսնի, չկա՞ մի քաղաքական ուժ, որի հետ առաջիկայում կգործակցեք։
– Իսկ քաղաքական պրոցեսներ կա՞ն, որ մենք դրա մեջ լինենք կամ համագործակցենք։ Քաղաքական դաշտում ոչինչ չի կատարվում, մենք էլ մեր անելիքն ի սկզբանե այդ ոլորտում չենք տեսել, այս կառույցը հիմնականում ռազմական, բանակային հարցերով է զբաղվում։ Երբ որ լինի քաղաքական պրոցես, ու մենք զգանք, որ կա մեր մասնակցության անհրաժեշտությունը՝ կլինենք։ Այս պահի դրությամբ այդպիսի գործընթացներ քաղաքական դաշտում չեն կատարվում։
– Իսկ ի՞նչ կարծիք ունեք Ժիրայր Սեֆիլյանի հրապարակած հեղափոխական ցուցակի մասին։ Ճիշտ է, ազատամարտիկները այդ ցուցակում չկան, բայց ասում են՝ վերջնական ցուցակ չէ, հնարավոր է՝ ընդլայնվի կազմը։
– Ես նրանց շատ եմ հարգում՝ մեր մարտական ընկերներն են։ Բայց կարծում եմ, որ եթե պրոցեսներ հասունանան, ցուցակներ և այլ բաներ հաշվի չեն առնվի։ Երկրում այնպիսի մթնոլորտ է, որ վաղ թե ուշ գործընթացներ լինելու են՝ այսպես երկար շարունակվել չի կարող։ Կլինի՞ այդ պրոցեսներում մեր կարիքը՝ կքննարկենք։ Աստված տա՝ վիճակն այնքան լավ լինի, որ մեր կարիքը չլինի։ Բայց այս պահի դրությամբ այդքան էլ լավատես չեմ։
– Ամեն դեպքում ձեր մասնակցությունը չի՞ բացառվում։
– Մենք հոգով-սրտով միշտ պատրաստ ենք լինել մեր ժողովրդի կողքին, բայց ամեն քաղաքացի պետք է ինքն իրենով գիտակցի, որ իրենից շատ բան է կախված, իր ձայնը, իր կարծիքը ևս վճռորոշ է։ Երբ քաղաքացին այդ գիտակցությունն ունենա, հավատացեք՝ ոչ մի ցուցակի ու ցուցակագրությունների անհրաժեշտություն չի առաջանա։ Այնպիսի տպավորություն է, որ մարդկանց դիմեդրոլ են տվել՝ այսպես շարունակվել չի կարող, վաղ թե ուշ գործողություններ կլինեն, իրավիճակը կպայթի։ Մենք հո այս անօրինականությունների համար չե՞նք պայքարել, մեր մարտական ընկերները հո այս անօրեն երկրի համար չե՞ն զոհվել։ Դա պետք է հասկանա ցանկացած քաղաքացի ու իր ներդրումն ունենա։ Հավատացեք՝ մենք էլ կլինենք այնտեղ, որտեղ մեր ժողովուրդը կլինի, ու որտեղ մեր կարիքը կլինի։ Չնայած նորից ասեմ՝ տա Աստված, որ մեր կարիքը չլինի։