«Առաջին լրատվական»-ի զրուցակիցն է ՌԱՀՀԿ տնօրեն, քաղաքագետ Մանվել Սարգսյանը։
-ՌԴ նախագահ Վլադիմիր Պուտինի խորհրդական Սերգեյ Գլազևը Երևանում ուշագրավ հայտարարություն է արել Ադրբեջանի՝ Եվրասիական տնտեսական միությանն անդամագրվելու վերաբերյալ։ Գլազևը մասնավորապես նշել է, որ դա կախված է Հայաստանից։ Ձեր կարծիքով, ի՞նչ ենթատեքստ ունի այս հայտարարությունը։
-Բավականին հետաքրքիր իրավիճակ է։ Դրանով, փաստորեն, Ռուսաստանը դիրքորոշում է հայտնել Ադրբեջանի՝ ԵԱՏՄ հնարավոր անդամակցության վերաբերյալ և դա շատ էական է։ Քանի որ դա կապվեց Հայաստանի որոշման հետ՝ ևս շատ ուշագրավ եմ համարում, փաստորեն ընդգծվեց, որ վերջնական խոսքը Հայաստանինն է։ Դժվար է ասել՝ ինչու Ռուսաստանն այդպես արեց։ Նա հեշտացրեց իր գործը՝ բարդացրեց Ադրբեջանի վիճակը։ Այսինքն՝ եթե Ադրբեջանը ցանկանա անդամագրվել այդ միությանը՝ բավականին բարդ հանգամանքներում դա տեղի կունենա, ուրեմն պետք է Հայաստանի հետ խոսի։ Այն խոսակցությունները, որ եղել են՝ առ այն, որ Ադրբեջանը ԵԱՏՄ կմտնի Ղարաբաղի խնդիրը հօգուտ իրեն լուծելու դիմաց՝ դա Ռուսաստանի համար անընդունելի կլինի, որովհետև Ռուսաստանը կցանկանար, որ Ադրբեջանը առանց նախապայմանների դառնա ԵԱՏՄ անդամ։ Այս հայտարարությունն իր մեջ պարունակում է Ռուսաստանի այդ մոտեցման նրբությունը։ Այսինքն՝ այս դեպքում Ռուսաստանի համար շատ ավելի հեշտ կլինի խոսել Ադրբեջանի հետ։
-Կարծում եք, Հայաստանը կարո՞ղ է ընդդիմալ, երբ ենթադրենք Ադրբեջանը նման ցանկություն հայտնի, և ԵԱՏՄ անդամ մյուս բոլոր պետություններն իրենց համաձայնությունը տան։
-Հայաստանը կասի՝ մենք մտել ենք ԵԱՏՄ առանց Ղարաբաղի, դուք էլ պետք է նույնն անեք։ Այստեղ որևէ մեկը չի կարող ինչ-որ բան ասել։ Հիշո՞ւմ եք՝ Ղազախստանը ժամանակին ասում էր՝ Հայաստանը պետք է ՄԱԿ-ի ընդունած սահմաններով մտնի ԵԱՏՄ, այս դեպքում որևէ այլ բան այդ երկիրը հայտարարել չի կարող։ Ղարաբաղը Ադրբեջանի ենթակայության երկիր չէ, սահմանը փակ է՝ ուստի կարող եք առանց Ղարաբաղի մտնել։
-Այսինքն՝ եթե Ղարաբաղը չմեջբերեն՝ Հայաստանը կարո՞ղ է իր համաձայնությունը տալ։
–Հայաստանը պետք է պայման դնի՝ ցանկանո՞ւմ եք մտնել մեր կազմակերպություն՝ ուրեմն ձեր գոյություն ունեցող տարածքով, Ղարաբաղը չի ենթարկվում, այդ սահմանը փակ է։ Երբ կլուծվի Ղարաբաղի խնդիրը, կորոշվի՝ որտեղ կլինի Ղարաբաղը։
-Իսկ հնարավոր չե՞ք համարում այսպես հրամցնեն՝ ԵԱՏՄ-ն լավ հարթակ կարող է լինել Ղարաբաղի խնդիրն այնտեղ լուծելու համար, և ըստ էության, Մինսկի խմբին այլընտրանքային ձևաչափ առաջանա։
-Այդ նույն հեքիաթները 91 թվականին էլ էին ասում, երբ Ադրբեջանին մտցրեցին ԱՊՀ, դրանից հետո ՀԱՊԿ։ Այդ նույն հեքիաթներն էին ասում՝ կլինենք նույն կազմակերպութան մեջ, գործը կհեշտանա, բայց հակառակը՝ բերեց պատերազմի։
-Գլազևը նաև հայտարարել է, որ եթե Կովկասում խաղաղություն ենք ուզում, ուրեմն տարածաշրջանի բոլոր երկրները պետք է դառնան ԵԱՏՄ անդամ։ Ռուսաստանի այսպիսի ախորժակն ի՞նչ վտանգներ է պարունակում։
-Դրանք նույնպես Ռուսաստանի հեքիաթներն են։ Մի քիչ ոգևորվել են քրդական խնդրով՝ առ այն, որ Թուրքիան ու Իրանը բավականին բարդ իրավիճակում են հայտնվել։ Հիմա Մոսկվան սկսել է շռայլորեն այսպիսի ցանկություններ տարածել։