Երևանի գրողների միության նախագահ Աբգար Ափինյանը մի փոքր չափազանցված է համարում ռուսաց լեզվի հայեցակարգի հետ կապված մտահոգությունները: «Առաջին լրատվական»-ի հետ զրույցում նա նշեց, որ վստահ է՝ ԿԳ նախարարությունը լրջորեն կքննարկի այդ հայեցակարգի հաստատման իրավական հիմքերը, և քննարկումները դեռ կշարունակվեն:
«Չափից ավելի շատ է մեր մամուլում և հանրության մեջ տարածվում նեգատիվ մոտեցումը կյանքի երևույթներին: Հրապարակը տվել են բոլորին, այսօր բոլորը խոսում են, և այս հսկայական աղմուկի մեջ կորչում է ճշմարտությունը: Շատ մտավորականներ կան, որոնք իրենց բայղուշ կանխատեսումներով մի փոքր ավելի են ուզում սևացնել առանց այն էլ դժվար վիճակը, որը հաստատվել է Հայաստանում: Պետք է հրապարակ գան լավատես մարդիկ»,- ասաց Աբգար Ափինյանը:
Նրա խոսքով՝ բոլորը բերան ունեն, բայց ամեն բերան չէ, որ խոսելու համար է: Նա նշեց, որ մենք պետք է հոգատար լինենք օտար լեզուների նկատմամբ, այսօր մեր երիտասարդությունը վատ գիտի օտար լեզուներ, շատ վատ գիտի ռուսերեն, և այս հայեցակարգին պետք է մոտենալ այս սկզբունքով. «Հայոց լեզուն թագավորն է Հայաստանի, և փոխանակ մտածենք, որ այսօր մեր մտավորականները, երիտասարդները հայերեն չեն խոսում, այդ մասին մենք երբեք չենք խոսում: Ոչնչացնում են, մորթում են հայոց լեզուն մեր կայքերում, գեղարվեստական գրականության մեջ, մեր լեզվաբանները, գրականագետներն արդեն հայերեն չեն գրում»:
Աղետը, նրա խոսքով, այն է, երբ գրագետ մասսան հայերեն չի խոսում: «Ես ապստամբության, հեղափոխության կոչ եմ անում, թող ոտքի կանգնեն իսկական հայրենասեր մտավորականները: Չգրողները, չգիտնականները, լրագրության հետ կապ չունեցող մարդիկ ասպարեզում են, և այս ընդհանուր ժխորի մեջ ճշմարտություն որտե՞ղ որոնենք»,- ասաց Աբգար Ափինյանը:
Հարցազրույցն ամբողջությամբ՝ տեսանյութում:
