ԱԺ «Ելք» խմբակցության պատգամավոր, նախկին վարչապետ Արամ Սարգսյանը կարծում է, որ ԱԺ փոխխոսնակ Էդուարդ Շարմազանովի հայտարարությունը, թե Հայաստանը միայնակ չի կարող ամբողջությամբ իրականացնել իր պաշտպանությունը, խոսում է այն մասին, որ այս իշխանական համակարգի պարագայում մեր անվտանգությունը չի կարող պահվել:
«Դրանից ելնելով քայլ է կատարում, իրականում այդ քայլերի պատճառը ռազմավարական գործընկերոջը հաճոյանալն է և դրա արդյունքում իշխանությունը պահելը: Երկար ժամանակ է, որ իրենք պնդում են, որ հայ-թուրքական սահմանը մենք ինքնուրույն հնարավորություն չունենք և դրանից ելնելով բազմաթիվ քայլեր են արել: Դրանից ելնելով՝ բազա է բերվել Հայաստան, հետո բազայի պայմանագիրը երկարձգվել է 25 տարով՝ դարձնելով 49 տարի: Մտանք ՀԱՊԿ-ի մեջ, հետո էլ ասացին՝ սա էլ չի բավարարում, հիմա էլ Եվրասիականը: Առ այսօր էլ ՀՅԴ-ն պնդում է, եթե ԵԱՏՄ մտել ենք անվտանգությունից ելենելով, և Արմեն Ռուստամյանը մշտապես նշում է, որ միությանը նայում է որպես անվտանգության բաղադրիչ: Դրանով իրենք շեշտում են՝այո, տնտեսական առումով կյանքը չի լավացել, բայց որպես անվտանգության բաղադրիչ դա իրենց բավարարում է: Հիմա էլ բերել են այս օրենքը և ուզում, որ համատեղ հայ-ռուսական զորամիավորում ստեղծեն: Լավ՝ ունենք բազա, դա չի բավարարում, որ ենթադրենք, թե Թուրքիան պատերազմելու է Հայաստանի դեմ՝ պայքարեն, դրա համար բազա կա, ՀԱՊԿ կա, հակաօդային ուժեր կան, դրա համար էլ ԵԱՏՄ մտաք, էս ամեն ինչը չի՞ բավարարում: Եթե այսքանը չի բավարարում՝ սա էլ չի բավարարելու: Դրանից հետո լինելու է, որ ՀՀ գերագույն գլխավոր հրամանատարը ՌԴ նախագահն է, ՀՀ-ն դառնում է ՌԴ-ի մաս, որ հանկարծ թուրքերը մեր վրա չհարձակվեն: Ու երբ ասում ես, որ դա վիրավորական է, մարդիկ նեղվում են»,- շեշտեց նա:
Արամ Սարգսյանի դիտարկմամբ՝ այսպիսի հայտարարություններով նաև Վազգեն Սարգսյանի, մեր բանակի ակունքներում կանգնած մյուսների կատարած աշխատանքն են ստվերում:
«Եղբայրս ընդգծված արժանապատվության զգացում ունեցող մարդ էր և ՌԴ-ի հետ մեր հարաբերություններում երբեք չի շողոքորթել ռուսական իշխանություններին: Եղել է ընդհակառակը՝ նրանք են միշտ բաժակ բարձրացրել Վազգենին հիշելով: Վազգենի ու ՌԴ պաշտպանության նախարար Պավել Գրաչովի փոխհարաբերություններն ընկերականի վերածվելով, բավականին լուրջ խնդիրներ են լուծվել: Ընկերականը՝ հավասարը հավասարի փոխհարաբերությունների մասին է»,- ընդգծեց նա:
Մանրամասները՝ տեսանյութում:
