«Գլոբալիզացիայի և տարածաշրջանային համագործակցության» կենտրոնի ղեկավար, քաղաքագետ Ստեփան Գրիգորյանի կարծիքով՝ ԵԱՏՄ-ից դուրս գալու առաջարկը սատարողներին ուղղված քննադատությունները Ռուսաստանից ցույց են տալիս, որ այդ ուժերն ու գործիչները Հայաստանում մարգինալ չեն. «Պարզվում է՝ լավ էլ հեղինակություն ունենք։ Եկեք մի փորձարկում անենք՝ ման գանք Երևանի փողոցներով, մարդիկ մոտենում ու ասում են, որ ինձ հաճույքով լսում են։ Երկրորդ՝ գիտեք Ռուսաստանը լուրջ երկիր է, ունի վերլուծական կենտրոններ, ու նրանք շատ լավ գիտեն, որ նման տրամադրությունները Հայաստանում մեծանում են։ Ռուսաստանում դա ցավոտ են ընդունում, ուզում են կիսաստրուկի վիճակում լինենք»,-«Առաջին լրատվական»-ի հետ զրույցում ասաց Գրիգորյանը։
Քաղաքագետն ընդգծում է, որ մեր քաղաքացիների կողմից ցանկացած քննադատություն ընդունելի է իր համար, բայց դրսում ապրողները, թեկուզև ազգությամբ հայերը, դրա իրավունքը չունեն: «Թող գան մեզ հետ կողք-կողքի ապրեն՝ նոր քննադատեն։ Ապրում են տարբեր երկրներում ու քննադատում։ Ինչ-որ չգիտեմ, որ երկրի հատուկ ծառայությունների հետ գործ ունեցող մարդիկ քննադատում են։ Թող գան այստեղ ապրեն, նոր խոսեն»,- ընդգծեց Ստեփան Գրիգորյանը։
Ինչ վերաբերում է հայ-ռուսական միացյալ զորախումբ ստեղծելու նախագծի վավերացմանը խորհրդարանում, Գրիգորյանը մտահոգություն հայտնեց. «Համատեղ զորախումբ է, բայց նայում ես պայմանագիրը, այն ինչ որ կա՝ հարցեր է առաջացնում։ Ինչի՞ հետ է կապված, որ կարող է լինել զարգացում, որ ռուս գեներալնե՞րը կարող են ղեկավարել։ Հարց եմ տալիս՝ Հայաստանի տարածքում ինչո՞ւ պետք է ինչ-որ պայմաններում ռուս գեներալը կարգավորի։ Ռուսաստանին այդ միացյալ զորախումբը պետք է, որպեսզի առաջին հերթին Մերձավոր Արևելքում գործողություններ ծավավելու համար կոալիցիա լինի։ Կարևոր չէ՝ ինչքան զորք կուղարկենք, բայց իր համար կարևոր է, որ մենակ չլինի։ Հարցն այն է, թե մենք ինչ ենք շահում, ես մեր շահը չեմ տեսնում։ Շահը միայն իշխանությանն է՝ այնպես անեն, որ Ռուսաստանը չուզենա, որ իրենք հեռանան»։
Հարցազրույցն ամբողջությամբ՝ տեսանյութում: