Ռուս ազգայնական գործիչ, «Միջազգային եվրասիական շարժման» ղեկավար Ալեքսանդր Դուգինը շարունակում է մնալ իր համոզմանը, որ Լեռնային Ղարաբաղի հիմնահարցը կարող է լուծվել կարգավորման ռուսական ծրագրի հիման վրա, որը մամուլում հայտնի է «Լավրովի պլան» անունով:
Քաղաքագետը «Առաջին լրատվական»-ի հետ զրույցում կարծիք հայտնեց, թե Հայաստանի և Ադրբեջանի նախագահների առաջիկա հանդիպման ընթացքում բարձրացվելու է Լեռնային Ղարաբաղի հինգ շրջանների վերադարձի հարցը:
«Նախագահների հանդիպումն այսօր շատ կարևոր է, որովհետև վիճակը հայ-ադրբեջանական հարաբերություններում հասնում է մի այնպիսի կետի, երբ արդեն ահնհար կլինի չլուծել խնդիրը: Պետք է հասնել այս ճգնաժամի հանգուցալուծման: Ենթադրում եմ, որ նախագահների այդ հանդիպման ժամանակ կդրվի Ղարաբաղի հինգ շրջանների ապաշրջափակման հարցը, բայց խնդիրն այն է, որ Հայաստանի վերահսկողության տակ գտնվող հինգ շրջաններն ադրբեջանական կողմին վերադարձնելու թեման շատ սխալ է լուսաբանվում թե՛ հայկական, թե՛ ադրբեջանական և թե՛ ռուսական մամուլում: Ես ապշած էի այն փաստից, որ երբ խոսքը գնում է հինգ շրջանների վերադարձի մասին, որպես կանոն այդ հարցին սխալ գնահատական է տրվում, ուստի դրա մասին շատ դժվար է խոսել և՛ Հայաստանում, և՛ Ադրբեջանում, և՛ Ռուսաստանում, քանի որ ձևավորվել են անզիջում, սխալ տեսակետներ: Օրինակ՝ հայկական մամուլում գերիշխում է այն կարծիքը, որ դա կլինի Հայաստանի ազգային շահերի դավաճանություն: Ադրբեջանական մամուլում ձևավորվել է ազգայնական այն զգացումը, թե դա, ընդհակառակը, կլինի ռևանշ, Ադրբեջանի հաղթանակը: Իսկ ռուսական մամուլում ոչ ոք լուրջ ուշադրություն չի դարձնում այդ նախագծին: Իմ կարծիքով՝ այդ նախագիծը շատ լավ է մշակված, պարզապես կարևոր է, որ լրագրողները ևս ճիշտ ներկայացնեն այն»,- նշեց Ալեքսանդր Դուգինը:
