Ադրբեջանը տոտալիտար երկիր ներկայացնելու և երկիրը մրոտելու փորձերը գալիս են որոշակի շրջանակներից, որոնք հետաքրքրված չեն զարգացմամբ և ձգտում են իշխել Ադրբեջանում։ Այս մասին հայտարարել է Ադրբեջանի նախագահ Իլհամ Ալիևը ԵՄ խորհրդի քաղաքականության և անվտանգության հարցերով կոմիտեի պատվիրակության հետ հանդիպմանը։ Այս մասին փոխանցում է Turan գործակալությունը։
«Այդ շրջանակները ջանում են ներկայացնել Ադրբեջանը որպես տոտալիտար, ավտորիտար երկիր, որտեղ ոտնահարվում են իրավունքներն ու խախտվում ազատությունները։ Այդ միտումը շարունակվում է իմ՝ նախագահ ընտրվելու օրից»,-ասել է Ալիևը։ Մրոտման արշավի հեղինակներ է նա անվանել «հայկական լոբբին, մի շարք ՀԿ-ներն ու որոշ շրջանակներ, որոնք չեն կարողանում իրենցից ցանկալին ստանալ»։
Նրա խոսքով՝ Ադրբեջանում ապահովվում են բոլոր ազատությունները։ Մամուլի և հավաքների ազատության սահմանափակման մասին խոսք լինել չի կարող, ընդդիմությունը պարբերաբար հանրահավաքներ է անցկացնում։ «Ինչ վերաբերվում է ձերբակալություններին, ապա դրանք տեղի են ունենում ցանկացած երկրում։ Ինչ վերաբերվում է ոստիկանական բռնությանը, կարող եմ ասել, որ դուք Ադրբեջանում նման բան չեք տեսնի»,-նշել է նա։
Անդրադառնալով Եվրոպայի խորհրդից դուրս գալու հնարավորությանը՝ Ալիևն ասել է, որ երկրում հանրային կարծիքը Եվրոպայի խորհրդի մասին այնքան էլ դրական չէ։
«Ադրբեջանի դեմ նպատակաուղղված հարձակումները հիասթափություն են առաջացնում, նպաստում այնպիսի մտքերին, թե «մեր ինչին է պետք այդպիսի կազմակերպությունը»։ Կասեմ Ձեզ բացահայտ, եթե Ադրբեջանը լքի Եվրոպայի խորհուրդը, ոչ ոք դրան նշանակություն չի տա։ Մեր կյանքում ոչինչ չի փոխվի, մենք չենք սկսի ապրել ո՛չ ավելի լավ, ո՛չ ավելի վատ, ո՛չ ավելի հարուստ, ո՛չ ավելի աղքատ»,-ասել է Ալիևը։