«Աստված տա, որ ես սխալվեմ, բայց այս իշխանությունները ինքնուրույնություն չունեն։ Եվրոպական համակարգի հետ հարաբերությունների սերտացումը չի բխում ՀՀ իշխանությունների տերերի պատկերացումներից։ Նույնիսկ գրել եմ, որ սրանք չեն կարող ստորագրել, սրանց չի թույլատրվի»,- «Առաջին լրատվական»-ի հետ զրույցում ասաց ԱԻՄ առաջնորդ Պարույր Հայրիկյանը՝ հավելելով, որ իր կարծիքով՝ այս անգամ ևս Եվրամիության հետ համաձայնագիրը չի ստորագրվի։
Հայրիկյանն ընդգծում է. «Եթե ես սխալ դուրս գամ՝ ասել եմ, որ 6 ամիս ինքս ինձ կպատժեմ՝ մամուլի ասուլիսներ ու հարցազրույցներ չեմ տա։ Վստահ եմ, գիտեմ սրանց էությունն ու բովանդակությունը։ 2013-ին էլ ընկերներիս հետ խոսելիս ասում էի՝ չեմ պատկերացնում, սրանք ինչպե՞ս կարող են ստորագրել, փաստորեն չէի սխալվում»,- ասաց Պարույր Հայրիկյանը։
ԱԻՄ առաջնորդը նշում է՝ փաստաթղթի ստորագրումը մեծ առաջադիմական քայլ կլինի Հայաստանի համար. «Միանգամից ասեմ, որ 2013-ին եվրոպացիներն իրենց շատ սխալ պահեցին, չպետք է այդպիսի զուսպ կեցվածք դրսևորեին։ Էս ի՞նչ եք անում, Սերժը Պուտինի՝ իր ղեկավարի հետ հանդիպեց, ինչ-որ բան հայտարարեց, դուք շարունակեք բանակցությունները, թող Սերժը չգա ստորագրելու, ինչո՞ւ եք Սերժի հայտարարությունը համարում ձեր բանակցությունների ամփոփում։ Նա, ի վերջո, երկրի նախագահ է, որը մարդ է, և որին կարող էին վախեցնել։ Ինձ շատ լուրջ մարդիկ ասել են, որ նրանց վախեցրել են»։
Մեր զրուցակիցը մտահոգություն ունի, որ վերջին պահին ՌԴ նախագահը կարող է թույլ չտալ ստորագրել այդ համաձայնագիրը։
Հարցազրույցն ամբողջությամբ՝ տեսանյութում: