Թուրքիայի նախագահ Ռեջեփ Թայիփ Էրդողանն իրանցի նախագահ Հասան Ռուհանիի հրավերով ժամանել է Թեհրան, հայտնում է Minval.az-ը։ Սպասվում է, որ պետությունների ղեկավարները կքննարկեն երկկողմ հարցեր, տարածաշրջանային և միջազգային խնդիրներ, ինչպես նաև կնախագահեն բարձր մակարդակի համագործացկության խորհրդի նիստը։
Թուրքիայի նախագահի հետ Թեհրան է ժամանել նաև Թուրքիայի արտգործնախարար Մևլյութ Չավուշօղլուն, էկոնոմիկայի նախարար Նիհաթ Զեյբեկչին և այլ բարձրասիճան այրեր։
Թեհրանում անցկացվել է նախագահների միջև 1+1 ձևաչափով հանդիպում։
Իրաքի հյուսիսում քրդական ինքնավարության անկախության հայտարարման դեպքում, Թուրքիան, Իրանն ու Իրաքը տարածաշրջանում կանցկացնեն համատեղ ռազմական գործողություն։ Ինչպես հայտնում է Haber7-ը, այդ մասին պայմանավորվածությունը ձեռք է բերվել Իրանի ու Թուրքիայի նախագահների հանդիպման ժամանակ։
Պետությունների ղեկավարները նաև պայմանավորվել են երկու երկրների միջև ապրանքաշրջանառության մակարդակի բարձրացման մասին։ Էրդողանն ու Ռուհանին նաև հայտարարել են Իրաքի և Սիրիայի տարածքային ամբողջականությանն աջակցելու մասին։
