Իրավապահ մարմինների աշխատակիցները Թբիլիսիի կենտրոնում՝ քաղաքապետարանի շենքի մոտ ձերբակալել են քաղաքացիների, ովքեր մասնակցել են ընդդիմադիր «Միացյալ ազգային շարժում» կուսակցության բողոքի ակցիային։ Այս մասին հայտնում է Վրաստանի ՆԳՆ-ը։
Կուսակցության ներկայացուցիչներն ու կողմնակիցներն արդեն երեք ժամից ավելի բողոքի ակցիա են անցկացնում՝ պահանջելով կասեցնել որոշումը մայրաքաղաքի կենտրոնի հողակտորները միլիարդատեր Բիձինա Իվանիշվիլիի ընկերություններին փոխանցելու մասին։ Ավելի վաղ Թբիլիսիի քաղաքային խորհուրդը նիստի ժամանակ որոշում էր ընդունել քաղաքի կենտրոնի մոտ 2000 քառակուսի մետր տարածքը սիմվոլիկ՝ 1 լարիով Old City Development ընկերությանը փոխանցելու մասին, որը հիմնադրվել է Վրաստանի նախկին վարչապետ Իվանիշվիլիի կողմից։ Այդ տարածքում կտեղակայվի «Թբիլիսիի համայնապատկեր» նախագծի օբյեկտներից մեկը։
Բողոքի ակցիայի ժամանակ ձերբակալվել է 3 մարդ, հայտնել է ՆԳՆ-ը՝ չհստակեցնելով, թե ինչ մեղադրանքներով է կատարվել ձերբակալությունը։
Իվանիշվիլիի նախաձեռնությամբ ստեղծված նախագծի արժեքը 500 մլն դոլար է։ Նախագիծը ենթադրում է 4 համալիրների շինարարություն մայրաքաղաքի պատմական մասի տարբեր կետերում։
