«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ Պետրոս Մակեյանը։
– Պարոն Մակեյան, շաբաթ օրը տեղի ունցավ Ժիրայր Սեֆիլյանի առաջարկով ազգային դիմադրության ճակատ և ժողովրդական ընդվզման նախապատրաստելու առաջին հավաքը։ Դուք և Թամար Հովհաննիսյանը կոորդինացնում եք այդ հանձնաժողովի աշխատանքները: Ինչպե՞ս եք գնահատում առաջին փակ հանդիպումը:
– Նորմալ կարելի է գնահատել: Համակարգման աշխատանքները առայժմ ես և Թամար Հովհաննիսյանն ենք իրականացնում: 31-ից 20-ն արձագանքել են, երկուսը հարգելի բացակա էին, 17-18 հոգի էր մասնակցում: Եղել է բուռն քննարկում: Կարծում եմ՝ երկրորդ հանդիպումն ավելի արդյունավետ կլինի: Քննարկվում էր, թե ինչպես կարելի է կազմակերպչական առումով ընթացք տալ Ժիրայրի ասած մոտեցումներին:
– Իսկ արդյոք հավաքվածները նույն կե՞րպ են պատկերացնում Հայաստանում ազգային դիմադրության ճակատ ձևավորելու ճանապարհը:
– Իհարկե՝ ոչ, շատ տարբեր, բայց քննարկումների արդյունքում պետք է ընդհանուր հայտարարի գանք, ոսկե միջինը գտնենք:
– Հայտարարության մեջ 31-ից, որոնց անունները նշել էր Ժիրայր Սեֆիլյանը, մի մասը մերժեց: Ովքե՞ր մասնակցեցին:
– 20 հոգի, որից երկուսը հարգելի բացակա են, չորսը դեռ չեն կողմնորոշվել, իսկ մնացածներին հրապարակային գիտեք, իրենց կարծիքը հայտնել են:
– Մի մասը մերժեցին, որքանո՞վ եք իրատեսական համարում այս ճակատի ձևավորումը:
– Կարծում եմ՝ եթե 20 հոգի հավաքվել են, համաձայնություն տվել, արդեն լուրջ հայտ է ներկայացված: Բացի այդ, պետք է հաշվի առնենք նոր համալրումը:
– Այսինքն՝ հնարավո՞ր է նոր ցուցակի հրապարակում:
– Դրան հաջորդ հանդիպումներում կանդրադառնանք:
– Ի՞նչ պարբերականությամբ եք հանդիպելու, քննարկումներ անելու:
– Առայժմ որոշված չէ, բայց հաջորդ հանդիպումը նորից շաբաթ օրն է լինելու: Կարծում եմ՝ առաջին մի քանի հանդիպումները փակ կլինեն, որից հետո արդեն հրապարակային կլինեն: Սա իմ կարծիքն է:
– Ի՞նչ եք կարծում՝ հանրությունը կաջակցի՞ այս նախաձեռնությանը:
– Կարծում եմ՝ ինչ-որ պահի հանրությունը պետք է խելքի գա, անընդհատ թմբիրի մեջ չի մնա, պետք է հասկանա, որ անդունդը գնալով խորանում է: Ամեն մեկը իր մաշկի վրա զգում է այդ խորացումը, անդառնալի հետևանքները, առավել ևս ապրիլյան քառօրյա պատերազմը դեռևս հիշողության մեջ է, թե ինչի է ընդունակ այս ռեժիմը:
– Ասացիք, որ 18 հոգի են ներկա եղել: Բացի ձեր և «Ժառանգություն» կուսակցություններից՝ այլ կուսակցություններից կայի՞ն:
– Մեր կուսակցությունից միայն ես էի մասնակցում, «Ժառանգություն» կուսակցությունից նույնպես կային, այլ կուսակցություններից նույնպես կային, սակայն կուսակցական պատկանելության խնդիր դրված չէ:
– Սեյրան Օհանյանը, Վարդան Օսկանյանը, Րաֆֆի Հովհաննիսյանը՝ ՕՐՕ դաշինքի առաջնորդները, որոնց անունները նույնպես ընդգրկված էին ցանկում, որևէ կերպ արձագանքե՞լ են: Եվ առհասարակ՝ ինչպե՞ս եք գնահատում ցուցակում նրանց ընդգրկված լինելը:
– Երկու շաբաթից Րաֆֆի Հովհաննիսյանը կլինի, կհանդիպի՝ կիմանանք իր կարծիքը, Սեյրան Օհանյանը մեկ շաբաթից կլինի, բայց կարծում եմ՝ հանդիպում կլինի, Օսկանյանից տեղեկություն չունեմ, որովհետև ես չեմ վերցրել իր հետ հանդիպման պատասխանատվությունը:
– Այսինքն՝ Սեյրան Օհանյանն ասել է, որ կարձագանքի և կհանդիպի՞:
– Օհանյանի հետ պետք է հանդիպենք:
– Դուք խնդիր չունե՞ք նրա՝ ցուցակում լինելու հետ կապված:
– Ես իմ կարծիքը դեռևս ապրիլին խորհրդարանական ընտրությունների նախաշեմին ասել եմ և կրկնելու իմաստ չեմ տեսնում, շարունակում եմ մնալ նույն կարծիքին:
