Արցախի ճանաչման շարունակվող գործընթացը վկայում է, որ Արցախի ժողովրդի կողմից ընտրված ինքնորոշման ուղին համարժեք կերպով է ընկալվում ու գնահատվում աշխարհում։ Այդ մասին Tert.am-ի հետ զրույցում ասել է Արցախի ԱԳՆ մամուլի քարտուղար Անի Սարգսյանը՝ մեկնաբանելով ԱՄՆ Միչիգան նահանգի Սենատի կողմից Արցախի ինքնորոշման իրավունքը սատարող բանաձեւի ընդունումը։
«Արցախի միջազգային ճանաչումն անշրջելի գործընթաց է եւ հետայսու եւս կմնա մեր արտաքին քաղաքականության առաջնահերթություններից մեկը։ Վստահ ենք, որ Արցախի ճանաչումը եւ ներգրավումը միջազգային գործընթացներին կապահովի հանրապետության քաղաքացիների կողմից իրենց իրավունքների եւ ազատությունների լիարժեք իրականացումը, ինչպես նաեւ թույլ կտա կայունություն ու անվտանգություն պահպանել տարածաշրջանում։
Մեր երախտագիտությունն ենք հայտնում բոլոր նրանց, ովքեր իրենց ներդրումն են ունեցել այս գործում»,- ասել է նա։