Կոմպոզիտոր, ՀՀ արվեստի վաստակավոր գործիչ, ՀՀ ժողովրդական արտիստ Տիգրան Մանսուրյանը «Առաջին լրատվական»-ի հետ զրույցում անդրարդել է «Խավարում» ցուցահանդեսի փակմանը: «Սա պետք է լիներ հայ պետականության կայացման առաջին օրերին, թե ինչու Առաջին հանրապետությունը փլուզվեց, ովքեր էին դրա ջատագովները, ում ջանքերով փլուզվեց»,-ասաց Տիգրան Մանսուրյանը՝ հավելելով, որ ինքը հարգում է այն մարդկանց, ովքեր սովետական իշխանության տարիներին մեր ձեռքբերումները գնահատել գիտեն, բայց իրողությունը նույնպես պետք է ասվի: «Պետք է ազատվել ցավից: Բա Չարենցին կտանեն այդպես ոռնալով վերջը կդնե՞ն: Եվ այնպես չէ, որ ուրիշ ազգերի մեծերի մեջ չեն եղել նման բաներ: Բա Լորկային կարելի՞ է օրը ցերեկով տանել սպանել, որովհետև միասեռական էր: Նարինեն լավ աշխատանք է անում, և դա վաղուց պետք է արվեր»,-ասաց նա՝ հավելելով, որ այսօր հսկայական հոգսերի մեջ սա պետք է մաքրված լիներ:
ՀՀ մշակույթի նախարար Արմեն Ամիրյանից «Առաջին լրատվական»-ը հետաքրքրվել է, թե ինչու Նարինե Թուխիկյանի հետ այդպես էլ հանդիպում չի կայացել և արդյոք «Խավարում» ցուցահանդեսն առաջիկայում կբացվի: «Խոսքն ամենևին ցուցադրանքի թերությունների մասին չէ, այլ ձևակերպումների, չլինելու և բացակայության մասին է: Նարինե Թուխիկյանը մեր լավագույն երկարամյա տնօրեններից է, ես կարծում եմ, որ նա շատ լավ հասկանում է, թե խոսքն ինչի մասին է: Եվ փորձել շահարկել այս ցուցադրության հետ կապված ինֆորմացիան, կարծում եմ տեղին չէ, չի կարելի նման բան անել»,-ասաց Արմեն Ամիրյանը: Իսկ ինչ վերաբերում է Նարինե Թուխիկյանի հայտարարությանը, որ նախարարությունը պետք է պարզաբանում տա, նախարարությունը պարզաբանում չի տալու, նախարարությունն արդեն ասել է իր ասելիքը և տնօրեն հանձնարարել պատշաճ ձևակերպումներ անել:
Արմեն Ամիրյանը անդրադարձավ նաև Վահան Արծրունու համերգի արգելքին: «Նախարարությունը և ոչ էլ ՊՈԱԿ-ը Վահան Արծրունու համերգի կազմակերպման հետ որևէ կապ չեն ունեցել»,-ասաց նա:
Մանրամասները՝ տեսանյութում: