Freedom House իրավապաշտպան կազմակերպությունը ողջունել է ԱՄՆ Կոնգրեսում Ադրբեջանի դեմ բանաձևի ներկայացումը։
«Որպես աշխարհի ամենահետադիմական ռեժիմներից մեկը, Ադրբեջանը շարունակում է անպատիժ խախտել մարդու իրավունքները՝ հարձակում գործելով քաղաքացիական հասարակության, մարդու իրավունքների պաշտպանների և անկախ մամուլի նկատմամբ»,-ասել է կազմակերպության նախագահ Մայքլ Աբրամովիցը՝ կոչ անելով Կոնգրեսին անցկացնել բանաձևն առանց ձգձգման։
Ավելի վաղ տեղեկացրել էինք, որ Ադրբեջանում մարդու իրավունքների խախտումների շարունակվող փաստերի հետ կապված՝ կոնգրեսական Քրիստոֆեր Սմիթը սենատոր Ջիմ Մաքգովերնի հետ միասին ԱՄՆ կոնգրես է ներկայացրել թիվ 537 օրինագիծը, որը պարունակում է Ադրբեջանում մարդու իրավունքների հարգման և օրենքի գերակայության պահանջ։ Այս մասին հայտնում է «Թուրան» գործակալությունը։
«Ակնհայտ է, որ մեր երկրների միջև առկա են անվտանգության և տնտեսության ոլորտում կարևոր կապեր, սակայն մարդու իրավունքների խախտումները չեն կարող անտեսվել»,-ասվում է Սմիթի հայտարարությունում։
Օրինագիծը կոչ է անում ԱՄՆ կառավարությանն առաջնահերթություն համարել մարդու իրավունքներն ու ադբեջանցի ժողովրդի հիմնարար ազատությունները՝ երկրի կառավարության հետ համագործակցության ժամանակ։
Օրինագիծը նաև կոչ է անում կիրառել Մագնիտսկու գլոբալ ակտի դրույթները՝ պատժելու Ադրբեջանի պաշտոնատար անձանց, ովքեր խախտում են մարդու՝ միջազգայնորեն ճանաչված իրավունքները։ Օրինագիծը հորդորում է Ադրբեջանի կառավարությանն ազատ արձակել բոլոր բանտարկյալներին, որոնց ազատազրկումը ճանաչված է քաղաքականապես մոտիվացված։