Հաջորդ շաբաթ Հայաստանում ճապոնական, կորեական և կանադական ընկերությունների հետ կանցկացվեն տեղեկատվական տեխնոլոգիաների գիտաժողովներ։ Այդ մասին մամուլի ասուլիսում հայտարարել է Հայաստանի կապի և տեղեկատվական տեխնոլոգիաների նախարար Վահան Մարտիրոսյանը։
Իսկ մոտ օրերս կմեկնարկի ArmTech տեխնոլոգիական կոնգրեսն ու DigiTec ցուցահանդեսը։ «Բոլորին հրավիրում ենք ծանոթանալու Հայաստանում և արտասահմանում աշխատող մեր ծրագրավորողների ու ինժեներների ձեռքբերումներին»,– հավելել է Մարտիրոսյանը։
Կարևորելով ՏՏ ոլորտի զարգացումը մեր երկրում՝ նախարարը նշեց, որ մեր երկիրը նախատեսում է աշխարհի 16 պետությունում ունենալ ՏՏ ներկայացուցիչներ: Ծրագրի ֆինանսավորումն իրականացնում է մասնավոր հատվածը. այն գնահատվում է 3 մլն դոլար: Ըստ Մարտիրոսյանի՝ արդեն իսկ 6 երկրում ՀՀ-ն ունի իր ՏՏ ներկայացուցիչը: «Բացի այդ, մասնավորի հետ համատեղ ներկայացվել է պիլոտային ծրագիր՝ ուղղված նորաստեղծ ընկերությունների ֆինանսավորմանը: Ծրագրի շրջանակում արդեն իսկ երկու ընկերության տրամադրվել է 10-ական մլն դրամի ֆինանսավորում՝ իրենց ծրագրերն իրագործելու նպատակով»,- ընդգծեց նախարարը: