Դալայ-լաման կարծում է, որ կյանքի իմաստը երջանկության մեջ է, որի նախադրյալներ են հանդիսանում կարեկցանքն ու մտքի հանգստությունը։ Այս մասին նա հայտարարել է Ռիգայում Բալթյան երկրների և Ռուսաստանի մշակույթի գործիչների հետ զրույցում։ Դալայ լաման այնտեղ ուսուցում է անցկացնում բուդդիզմով բոլոր հետաքրքրվողների համար։
«Եթե մի կողմ դնենք կյանքի իմաստի տարբեր կրոնական հայեցակարգեր և հենվենք գիտության վրա, ապա եզրակացությունն այսպիսինն է՝ մենք գտնվում ենք այստեղ և հիմա և ցանկանում ենք երջանկություն, ուրախություն, ոչ ոք տհաճություններ չի ուզում։ Բնությունից մեր մեջ արդեն դրված են սերն ու կարեկցանքը»,-ասել է նա՝ պատասխանելով կյանքի իմաստի մասին ռուս դրամատուրգ և ռեժիսոր Իվան Վիրիպաևի հարցին։
Նրա խոսքով՝ «մայրական սերը, երեխային մոր հպումը ուղեղի ճիշտ զարգացման առանցքային գործն է»։
Տհաճություններից խուսափելու, առողջությունը պահպանելու և երջանկություն ձեռք բերելու համար, համաձայն բուդդայական ուսմունքի՝ անհրաժեշտ է մտքի հանգստություն։ Դալայ լաման նշել է, որ ոչ մի բժիշկ նյարդայնանալու ու չարանալու խորհուրդ չի տալիս, այլ փոխարենը՝ լիցքաթափվելու և հանգստանալու։