«Ես շատ մարդկանց եմ ճանաչում, ովքեր ազատության մեջ գիշեր-ցերեկ բամբասում են այս իրավիճակից, բայց համապատասխան իրավիճակում փորձում են հաճոյանալ իշխանություններին։ Անկախ նրանից՝ հիմա կիսում եմ Սեֆիլյանի տեսակետը, թե ոչ՝ անազատության մեջ պայքարելու փորձ անող մարդուն սկզբունքային եմ համարում»,- «Առաջին լրատվական»-ի հետ զրույցում նման տեսակետ հայտնեց «Ելք» դաշինքի պատգամավոր Արամ Զ. Սարգսյանը՝ անդրադառնալով Սեֆիլյանի հրապարակած ցուցակին։
Մեր այն հարցին՝ արդյո՞ք Սեֆիլյանի նախաձեռնած ապագաղութացման պայքարն ու «Ելք» դաշինքի՝ ԵԱՏՄ-ից դուրս գալու առաջարկը համագործակցության հնարավորություն է ստեղծում, ընդդիմադիր պատգամավորն արձագանքեց. «Ես չեմ կարող վերլուծել, չեմ ուզում որևէ բան ասել՝ առաջարկությունն արված է մարդանց, թող նստեն-քննարկեն, իրենք էլ լրացնեն, այնպիսի առաջարկություններ անեն, որ հանրությունն էլ, ես էլ, ամբողջ հայությունը միանա։ Ինչ-որ տեղ նաև դրական եմ նայում, որ «Ելք» դաշինքից մարդիկ կան ներգրավված այդ ցուցակում։ Կքննարկենք՝ եթե նույնիսկ այն մարդիկ, ում առաջարկվել է՝ Նիկոլ Փաշինյանը կամ Սասուն Միքայելյանը չառաջարկեն՝ ես կառաջարկեմ, որ քննարկենք։ Նիկոլ Փաշինյանը գրավոր տեղյակ պահեց, որ նման բան կա։ Այսօր նա Գյումրի է գնացել՝ ՏԻՄ ընտրությունների հետ կապված «Ելք» դաշինքը բազմաթիվ խնդիրներ ունի՝ վաղը կամ մյուս օրը կհավաքվենք Ազգային ժողովում՝ կքննարկենք։ Համենայնդեպս, այն մարդիկ, որոնց անունները տրվել է, պետք է պատասխան տան»,- ասաց Սարգսյանը։
Մեր այն դիտարկմանը, թե ժամանակին նույն Սեֆիլյանն ու իր թիմը «Ելք» դաշինքի հասցեին մեղադրանքներ էին հնչեցնում իշխանությունների հետ համագործակցելու, ընտրություններին մասնակցելու, մանդատները վերցնելու հետ կապված, իսկ այսօր այդ դաշինքի մարդկանց հետ ճանապարհ անցնելու հնարավորություն են տեսնում, Արամ Սարգսյանը պատասխանեց. «Ես չեմ համարում, որ դա քաղաքականության մեջ անբարոյականություն է։ Դժբախտաբար, քաղաքական գործընթացները տարան նրան, որ Հայաստանում մոնոլիտ մի ուժ չձևավորվեց, որը միայնակ իր հզորությամբ կարողանար իր վրա վերցնել նման կարգի խնդիրներ լուծելը։
Ամենահաջողված օրինակցներից մեկը Հայ Ազգային Կոնգրեսն էր։ Լևոն Տեր-Պետրոսյանին այնքան էլ հաճելի չէր իմ կամ Ստեփան Դեմիրճյանի հետ համագործակցությունը, երկուսիս հետ էլ որոշակի հարցերում կային տարաձայնություններ, բայց նույնիսկ այդ կարգի գործիչը հասկացավ, որ իր ավանդով, առաջին նախագահի տիտղոսով, համախոհներով՝ միայնակ չի կարող, և նաև անհրաժեշտ է մեզ հետ համագործակցել»։
Հարցազրույցն ամբողջությամբ՝ տեսանյութում: