Եվրանեսթ խորհրդարանական վեհաժողովում ՀՀ ԱԺ պատվիրակության ղեկավար, ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը և պատվիրակության անդամ Մանե Թանդիլյանը վերադարձել են Բաքվից, որտեղ սեպտեմբերի 22-ին մասնակցում էին Եվրանեսթ ԽՎ-ի սոցիալական, կրթության, մշակույթի և քաղաքացիական հասարակության հարցերի հանձնաժողովի կողմից կազմակերպված համաժողովին:
«Առաջին լրատվական»-ի հետ զրույցում ԱԺ «Ելք» խմբակցության պատգամավոր Մանե Թանդիլյանը մանրամասներ պատմեց Բաքու այցից և նշեց, թե ինչու էր անհրաժեշտ՝ համաժողովին մեր պատվիրակության մասնակցելը:
«Այցն ինձ տվեց փորձ, իհարկե այդ փորձը կարելի է ձեռք բերել ամենուր, բայց ըստ էության գտնում եմ, որ անհրաժեշտ է, որ մեր լրագրողները, ՀԿ ներկայացուցիչները, բոլորը, ովքեր հնարավորություն ունեն ներկայացնել Հայաստանը հավուր պատշաճի՝ անկախ աշխարհագրությունից և այն համոզվածությամբ, որ Ադրբեջանը միշտ լինելու է այնտեղ հակահայկական քարոզչությամբ: Եվ ես գտնում եմ, որ շատ ճիշտ էր այցելությունը, քանի որ օրակարգը, որ նրանք պատրաստվում էին անել, չարդարացրեց իրեն, և այդ օրակարգով են իրենք յուրաքանչյուր պլատֆորմի ներկայանալիս»,- ասաց Մանե Թանդիլյանը:
Նա նաև նշեց՝ կուզենար, որ մենք ավելին անենք, քան անում ենք, որ մեր պատվիրակություններն ամբողջական կազմով լինեն, որ յուրաքանչյուր հարթակում ներկայացված լինենք:
«Ես չեմ ուզում, որ մենք թերագնահատենք ադրբեջանական գործոնը յուրաքանչյուր նման հարթակում»,- հավելեց Մանե Թանդիլյանը:
Հարցազրույցն ամբողջությամբ՝ տեսանյութում: