Իրաքի իշխանությունները հրաժարվում են ճանաչել Իրաքյան Քրդստանի անկախության մասին առաջիկա հանրաքվեի արդյունքները և շարունակում պնդել երկրի միասնության մասին։ Այս մասին հայտարարել է Իրաքի վարչապետ Հայդեր ալ-Աբադին։
«Հանրաքվեի, դրա արդյունքների հետ փոխգործակցություն չի լինի, և մենք կձեռնարկենք հետագա քայլեր՝ երկրի միասնության և բոլոր քաղաքացիների շահերի պաշտպանության համար»,-ասել է վարչապետը։
Ալ-Աբադին կրկին քննադատել է հանրաքվե անցկացնելու ինքնավարության պլանները։ Բացի այդ, նա հայտնել է քուրդ բնակչությանը, որ տարածաշրջանի խնդիրները գալիս են ոչ թե Բաղդադից, այլ տեղի իշխանությունների վատ կառավարումից և կոռուպցիայից։
«Անհրաժեշտ է բացատրել մեր թանկագին քուրդ ժողովրդին, որ տարածաշրջանի խնդիրների մեծ մասը հանդիսանում են ներքին և կապված չեն Բաղդադի հետ, և որ դրանք կխորանան անջատման կոչերի հետ»,-հայտարարել է իրաքյան կառավարության ղեկավարը։
Ալ-Աբադիի խոսքով՝ ինքնավարության իշխանությունները գործում են նավթի վաճառքից ստացված միջոցների ծախսման հարցում ոչ թափանցիկ։ Նրա խոսքով՝ Քրդստանի իշխանություններն օրական իրացնում են 900 հազար բարել, այսինքն՝ Իրաքում արդյունահանվող ողջ նավթի ¼-րդը, իսկ դա նշանակում է, որ Իրաքյան Քրդստանում բնակչության եկամուտը պետք է զգալի բարձր լինի։
