«Թքած-կպցրած փաստաթուղթ է․թերի, շատ դրույթներ ոչ ամբողջական, տեղ-տեղ նույնիսկ զայրույթի աստիճանի հասցնող անհեթեթ, անտրամաբանական ու կոռուպցիոն ռիսկերով լի»,- «Առաջին լրատվական»-ի հետ զրույցում նման կարծիք հայտնեց ճարտարապետ Սևադա Պետրոսյանը՝ անդրադառնալով «Ճարտարապետական գործունեության մասին» և կից ներկայացրած օրենքների նախագծերի փաթեթին, որն աշնանային նստաշրջանի առաջին քառօրյա նիստում ԱԺ-ն ընդունեց առաջին ընթերցմամբ։
Ճարտարապետի գնահատմամբ՝ այն տեսքով, ինչ տեսքով, որ ընդունվել է այս փաստաթուղթը բավականին մտահոգիչ է ու առկա ռիսկերը չհաշվարկված։
«Լավագույն դեպքում սա կարող էր լինել ինչ-որ մի հայեցակարգ, շատ վատ ձևով կազմված հայեցակարգ, սակայն օրենքի նախագիծ է, որը ընդունվել է ԱԺ-ի կողմից»,- նկատեց ճարտարապետը։
Հիշեցնենք, որ սույն նախագծով առաջարկվում է ստեղծել նաև Ճարտարապետների պալատ, որը նախագծի համահեղինակ, քաղաքաշինության պետական կոմիտեի նախագահ Նարեկ Սարգսյանի վստահեցմամբ՝ լինելու է Ճարտարապետների միության իրավահաջորդը։
«Ես՝ որպես աշխատող ճարտարապետ և իմ շատ գործընկերներ, երբեք չէինք ցանկանա, որ սա լինի այն փաստաթուղթը, որը կկարգավորի մեր մասնագիտական գործունեությունը։
Եթե մի կառույց ստեղծվում է ԱԺ-ում՝ քաղաքական մեծամասնություն ունեցող մեկ ուժի կողմից և ոչ մի տեղ նշված չի, որ այս կառույցը ստեղծումից հետո լինելու է անկախ, չի կարող լուծարվել, չի կարող փոփոխվել և այլն և այլն, ապա դա նշանակում է, որ այդ կառույցն այլևս անկախ չի կարող լինել։ Նախագծի երկրորդ գլխում նշված է, որ Ճարտարապետների պալատը կազմվում է և վարում է ճարտարապետների և նախագծային կազմակերպությունների մասնագիտական վարկանշային ցուցակները․ սա նշանակում է, որ Պալատն իրեն իրավունք է վերապահում այս կամ այն ճարտարապետին ասելու՝ դու լավ ճարտարապետ ես, մյուսը վատն է, էն մյուսն ավելի վատն է և այլն․ ճարտարապետին ու նրա գործունեությանը գնահատական տալը շատ բնական երևույթ է, սակայն այստեղ խնդիրը կայանում է նրանում, որ գնահատական տվողը պետք է լինի անկախ, իսկ ճարտարապետների վարկանշային ցուցակ կազմելը նշանակում է, որ ստեղծվելիք այդ Պալատը կարող է լինել «գործ բաժանող» կառույց, այսինքն՝ այնտեղի ներկայացուցիչները կամ դրա հանձնաժողովի անդամները կարող են որևէ ճարտարապետի ասել, քանի որ դուք ավելի լավ ճարտարապետ եք, հետևաբար դուք էլ ստանալու եք ամենալավ գործերը, բայց չէ՞ որ սա արդեն չեղավ ճարտարապետի շահերը պաշտպանող կառույց, այլ ճիշտ հակառակը կամ էլ դարձավ հենց այդ «գործ բաժանողը» կամ էլ պատվիրատուի շահերը պաշտպանողը և այլն․ նման վտանգավոր դրույթներ այս նախագծում բազմաթիվ են»,- շեշտեց Սևադա Պետրոսյանը։
Վերջինս չբացառեց նաև այն հանգամանքը, որ ինչ-որ դեպքում Պալատը որևէ ճարտարապետի կամայական ձևով կարող է զրկել արտոնագրից կամ որոշակի հարցերի ժամանակ՝ կողմնակալություն անել։
«Սա էլ իր հերթին մտահոգությունների առիթ է տալիս»,-հավելեց նա։
Մանրամասները՝ տեսանյութում։
