Այսօր տեղի է ունեցել «Հոգևոր Հայաստանի» հրավերով անցկացվող համահայկական միջոցառումը, որը կարձագանքի ինչպես ընթացիկ, այնպես էլ «Հայքի» առաջ քաշած խնդիրներին: Այդ մասին «Առաջին լրատվականի» հետ զրույցում ասաց «Հոգևոր Հայաստան» նախաձեռնության անդամ, աստվածաբան Վարդան Խաչատրյանը:
«Բոլոր քաղաքական կազմակերպությունների հետ շարունակվում են կոնսուլտացիաները, երկխոսությունը՝ կապված այն բանի հետ, թե որ փուլում ինչպիսի միասնականության խնդիր կարող է կանգնել: Ընտրություններից հետո իրավիճակը համեմատաբար լիցքաթափված էր, հիմա բավական ինտենսիվ աշխատանքներ են տարվում»,- մանրամասնեց նա:
Վարդան Խաչատրյանի խոսքերով՝ հիմա ստեղծվել է լուրջ, պայթյունավտանգ իրավիճակ, որից դուրս գալու համար պետք է ձևավորվի միասնական հայկական օրակարգ:
«Հիմա վարչապետ ով կդառնա, չի դառնա՝ ինձ այդքան չի հուզում: Մեր կուսակցությունների միասնականությունը խիստ իմաստալից է, որովհետև երկրի ներսում այդ օրակարգի իրականացման առումով պետք է լինեն քաղաքական ուժերը»,- ընդգծեց նա:
Վարդան Խաչատրյանի դիտարկմամբ՝ անհրաժեշտ է, որպեսզի մենք կարողանանք դուրս գալ մերձավորարևելյան թնջուկից, հրե օղակից:
«Ես ոչ մի կերպ չեմ տեսնում էստեղ լարման դաշտի որևէ պարպում, շարունակվում են ֆինանսատնտեսական, լրատվական, կիրառական կռիվները: Ամեն ինչ վկայում է այն մասին, որ իրավիճակը գնալով շիկանում է, տեսնում ենք, որ Ադրբեջան-Հայաստան կոնֆլիկտը շատ-շատ լուրջ խաղաքարտի է վերածվել: Հնարավոր է՝ պատերազմ լինի, որը որպես թիրախ կարող է ունենալ Կովկասի պայթեցումը»,- ընդգծեց նա:
Մանրամասները՝ տեսանյութում:
