ԱՄՆ նախագահ Դոնալդ Թրամփը համակրանքով է արտահայտվել Թուրքիայի նախագահ Ռեջեբ Թայիբ Էրդողանի՝ որպես բարեկամի մասին, որը «բարձր գնահատականներ» է ստանում «աշխարհի շատ դժվար մի հատվածը կառավարելու համար»։ Այս գովասանքը թուրք առաջնորդի հասցեին նա հնչեցրել է ՄԱԿ-ի Գլխավոր ասամբլեայի կուլուարներում՝ չնայած 2 երկրների հարաբերությունների մեջ առկա լարվածությանը, որի պատճառը ամերիկացի ցուցարարների նկատմամբ թուրքական անվտանգության աշխատակիցների բռնություններն են։
Թրամփի հետ Էրդողանի հանդիպումից մի քանի ժամ առաջ Թուրքիայի նախագահի կողմնակիցները ծեծել են 3 ցուցարարի, որոնք ընդհատել են Էրդողանի ելույթը նյույորքյան հյուրանոցում։ 2017թ. սա արդեն երկրորդ դեպքն է։ Առաջինը եղել է մայիսին, երբ Թուքիայի նախագահը այցելել էր ԱՄՆ։
Էրդողանը PBS հեռուստաընկերությանը տված հարցազրույցում հայտարարել է, որ «շատ է ափսոսում» մայիսին կատարված բռնության համար։ Ըստ նրա՝ Թրամփը մի շաբաթ առաջ զանգահարել է իրեն՝ ափսոսանք հայտնելով միջադեպի համար, և խոստացել «այդ խնդրին անդրադառնալ, երբ Էրդողանը պաշտոնական այցով ժամանի ԱՄՆ։
Սպիտակ տունը կտրականապես հերքել է Էրդողանի հայտարարությունը Թրամփի հետ հեռախոսազրույցի մասին։